Siejf-al-Isłam Kadafi — syn niabožčyka livijskaha lidara Muamara Kadafi — vyzvaleny pa amnistyi. Pra heta zajavili jaho advakaty ŭ efiry telekanała France 24, pieradajuć RIA Novosti.
Fota Reuters.
Advakaty Kadafi paviedamili, što jon skarystaŭsia zakonam ab amnistyi, jaki raspaŭsiudžvajecca, pa słovach abaroncaŭ, na «ŭsich livijcaŭ biez vyklučeńnia».
Taksama kamanda jurystaŭ, jakaja pracuje na Siejf-al-Isłama, źviarnułasia z chadajnictvam ab spynieńni pieraśledu svajho klijenta ŭ Mižnarodny kryminalny sud u Haazie. U zvarocie adznačałasia, što ich padabaronny ŭžo byŭ asudžany ŭ Livii na śmiarotnaje pakarańnie, a za adno i toje ž złačynstva nielha sudzić dvojčy.
Siejf-al-Isłam Kadafi byŭ pryhavorany da rasstrełu ŭ lipieni minułaha hoda sudom u Trypali. Sud pryznaŭ jaho vinavatym u žorstkim padaŭleńni paŭstańnia, jakoje pakłała kaniec kiravańniu jaho baćki ŭ 2011 hodzie.
Abvinavačvańni Kadafi-synu ŭ złačynstvach suprać čałaviečnaści, u svaju čarhu, vysunuŭ Mižnarodny kryminalny sud (MKS). Vosieńniu 2015 hoda prakuror MKS Fatu Biensuda paviedamiła pra ŭžyvańnie ŭ dačynieńni da jaho katavańniaŭ. Jana zaklikała livijskija ŭłady asudzić takija złačynnyja akty i pakarać asob, vinavatych u ich ździajśnieńni.
