Bolšaść biełarusaŭ nie chočuć raźmiaščeńnia kala svaich miežaŭ zamiežnych vojskaŭ i nie hatovyja padtrymać ni NATA, ni Rasiju pry hipatetyčnym kanflikcie pamiž imi. Pra heta paviedamlaje Niezaležny instytut sacyjalna-ekanamičnych i palityčnych daśledavańniaŭ (zarehistravany ŭ Vilni) pa vynikach svajho červieńskaha ahulnanacyjanalnaha apytańnia.
Sacyjołahi zadali pytańnie: «U apošni čas vakoł Biełarusi adbyvajecca naroščvańnie ŭzbrojenaj mocy: Rasija stvaraje ŭ zachodnim rehijonie novyja dyvizii, a NATA — raźmiaščaje svaje bataljony ŭ Polščy i krainach Bałtyi. Adny ludzi ŭ Biełarusi padtrymlivajuć dziejańni Rasii, a inšyja — Zachadu/NATO. A jak da hetaha staviciesia Vy?»
26,1% respandentaŭ vybrali adkaz «padtrymlivaju dziejańni Rasii: heta abaronić nas ad mahčymaj ahresii NATA», 10,6% — «padtrymlivaju dziejańni Zachadu/NATA: heta abaronić nas ad mahčymaj ahresii Rasii», a amal 58% — «nie padtrymlivaju ni adzin z bakoŭ, pakolki Biełaruś moža być uciahnutaja ŭ vajenny kanflikt».
Na pytańnie: «A kali taki kanflikt usio ž adbudziecca, na čyj bok Vy ŭstaniecie?» tracina adkazali «na bok Rasii», 13,4% — «na bok Zachadu», a 43,5% — «pasprabuju nie padtrymlivać nivodzin z bakoŭ».
— Pryčym, jak pakazaŭ analiz, moładź u najbolšaj stupieni schilnaja być u baku ad kanfliktu i nie zajmać ni adzin z bakoŭ u hieapalityčnaj kanfrantacyi. Nazirajecca strohaja liniejnaja zaležnaść: čym vyšej ŭzrost, tym vyšejšaja ŭciahnutaść, i tym vyšejšaja ŭciahnutaść na baku Rasii, — adznačajuć u NISEPD.
Biełarusy ŭ bolšaści (71%) admoŭna staviacca da ŭdziełu svaich suhramadzian u bajavych dziejańniach va Ukrainie. Tolki pa 11% apytanych vykazalisia ŭ padtrymku ŭdziełu biełarusaŭ na adnym i druhim baku adpaviedna.
Rost prazachodnich nastrojaŭ
Červieńskaje apytańnie zafiksavała nievialikaje paciapleńnie ŭ dačynieńni biełarusaŭ da Jeŭropy i, adpaviedna, pachaładańnie da Rasii.
Sacyjołahi ź NISEPD prapanavali apytanym paŭdzielničać u dvuch hipatetyčnych refierendumach: ab ustupleńni ŭ ES (tak ci nie) i pra vybar pamiž ES i RF (ustupleńnie ŭ Jeŭrasajuz abo abjadnańnie z Rasijaj).
Jak by vy prahałasavali na refierendumie ab ustupleńni ŭ ES? (u pracentach)
| Śniežań 2015 | Sakavik 2016 | Červień 2016 | |
| Za | 19,8 | 23,4 | 27,5 |
| Suprać | 56,1 | 53,9 | 50,3 |
Što b vy vybrali: ustupleńnie ŭ ES abo abjadnańnie z RF? (u pracentach)
| Śniežań 2015 | Sakavik 2016 | Červień 2016 | |
| Rasiju | 53,5 | 48 | 42 |
| ES | 25,1 | 31,2 | 34 |
Staŭleńnie biełarusaŭ da ZŠA składaniejšaje. Z adnaho boku, jak i raniej, najbolš varožaj krainaj biełarusy nazyvajuć ZŠA — taki adkaz dali 52,4%. Ź inšaha boku, da ZŠA ŭ cełym vielmi/chutčej pazityŭna staviacca 55,7%, chutčej/vielmi niehatyŭna 35,3%, da amierykancaŭ adpaviedna 60.6% vs. 28.2%, a da amierykanskaj navuki i techniki 71,2% vs. 18,3%. Tracina apytanych ličyć, što «Biełarusi abaviazkova treba adnavić narmalnyja adnosiny z ZŠA», mienš za čverć ličyć, što heta nie abaviazkova, a kala 35% staviacca da hetaha abyjakava.
— Vidavočna, što ŭ Biełarusi niama takoha hłybokaha i ahresiŭnaha antyamierykanizmu, jak u Rasii, — adznačajuć sacyjołahi.
U chodzie červieńskaha daśledavańnia NISEPD było apytana 1512 čałavieki, pamyłka reprezientatyŭnaści nie pieravyšaje 3%.
NISEPD — najstarejšy biełaruski niezaležny navukovy centr, jaki pravodzić daśledavańni hramadskaj dumki z pačatku 1992 hoda. U 2005 hodzie, paśla likvidacyi Viarchoŭnym sudom RB, byŭ vymušana pierarehistravany ŭ Litvie.
