Na prapahandysckim sajcie Life.ru (raniej — LifeNews) źjaviłasia rasśledavańnie Uładzisłava Malcava «Vašynhton finansuje adradžeńnie pahanstva ŭ Biełarusi».
Aŭtar demanstruje niaviedańnie historyi Biełarusi i robić kanśpirałahičnyja vysnovy, ź jakich vynikaje, što voś-voś i drakary histaryčnych rekanstruktaraŭ papłyvuć brać šturmam Dom urada.
Pryvodzim niekatoryja vytrymki z tekstu.
«Na race Muchaviec źjavilisia vikinhi, — pačynajecca rasśledavańnie life.ru. — 25 červienia na vadu byŭ spuščany drakar «Ślejpnir», vieślary jakoha — siabry arhanizacyj «Žalezny Žołud» i «Koła Pieruna». Udzielniki zapusku drakara demanstrujuć cikavaść da dachryścijanskich vieravańniaŭ, jakaja daloka sychodzić pa-za ramki histaryčnaj rekanstrukcyi».
Havorka nasamreč išła pra spusk na vadu drakara, jaki zrabili biełaruskija histaryčnyja kłuby. Mierapryjemstva prajšło ŭ Breście 25 červienia. Jość navat videa, źniataje miascovymi žurnalistami.
Što drakar robić na Muchaŭcy? Pryčyny zrazumiełyja — pa terytoryi sučasnaj Biełarusi niekali prachodziŭ šlach «z varahaŭ u hreki». Matyŭ aktyŭna vykarystoŭvajuć roznyja ahrasiadziby, prapanoŭvajučy turystam adčuć siabie vieślarom drakara, prakaciŭšysia niekalki kiłamietraŭ pa race.
Ale voś što piša pra heta aŭtar Life.ru.
«Vikinhi sapraŭdy naviedvali hetyja ziemli ŭ siaredniavieččy jak rabaŭniki i zavajoŭniki. Navošta zaraz adradžać pamiać ab ich? Navat na fonie adkryćcia pomnika Alhierdu takoha rodu inicyjatyva vyhladaje aburalna», — aburajecca «historyk» i dadaje, što ŭsio heta było apłočana amierykanskim ahienctvam pa mižnarodnym raźvićci USAID.
«U Rasii z 2012 hodzie dziejnaść USAID zabaroniena, bo hetaja jak by dabračynnaja struktura była adnoj z krynic finansavańnia hramadska-palityčnych prajektaŭ u Rasii», — piša Life.ru.
Dalej aŭtar pryvodzić vyniki manitorynhu staronak UKantakcie lidaraŭ kłubaŭ histaryčnaj rekanstrukcyi.
U dakor Ale Palikarpuk — haspadyni ahrasiadziby «Na zarečnaj vulicy», ułaśnicy drakara — aŭtar stavić toje, što jana padpisanaja na supołki «radnavieraŭ».
Darečy sp. Ała — žančyna hoda Biełarusi-2014 u naminacyi «Za adradžeńnie siała».
Frahmient śviatkavańnia Kupalla na ahra-siadzibie
Na dumku stvaralnika artykuła, taksama «kiepska» toje, što ŭ ahrasiadzibie hości mohuć zamović sabie rekanstrukcyju pahanskaha abradu — heta, va ŭjaŭleńni aŭtara, udar pa chryścijanstvie.
Spasyłki na navukovyja raboty daktaroŭ histaryčnych navuk-skandynavistaŭ, jakija publikujuć supołki rekanstruktaraŭ UKantakcie, aŭtar nazyvaje «prapahandaj sučasnaha skandynaŭskaha nieapahanstva».
A dalej i ŭvohule ździŭlaje čytača «šakujučymi» faktami.
«Istotny momant — u ahrasiadzibie ŭ miescy «rekanstrukcyi abradaŭ» uźviedzieny typovy pahanski idał. Jaho najaŭnaść nie afišujecca, u aficyjnych fotasiesijach na internet-resursach ahrasiadziby jon nie zaŭsiody traplaje ŭ kadry, ale ŭ 2014 hodzie jon byŭ sfatahrafavany žurnalistami sajta 21.by. Fatahrafija z abradu «dla svaich» potym źjaviłasia ŭ supołcy ŭ internecie», — aŭtar pryvodzić «fakty», u adkaz na jakija možna skazać chiba što «Nu i što?».
Darečy, «abrad dla svaich» — heta arhanizacyja śviatkavańnia Kupalla dla turystaŭ-isłandcaŭ, jakija viazuć u Biełaruś hrošy, heta možna zrazumieć, adšukaŭšy materyjał, na jaki spasyłajecca aŭtar.
Zrešty, usia Biełaruś śviatkuje hetaje «pahanskaje śviata», a isnavańnie idała nichto i nie chavaje — heta nieadjomny atrybut ahrasiadziby, jaki stvaraje anturaž i nie vyklikaje zakłapočanaści ni ŭ kaho, aproč asobnych žurnalistaŭ-kanśpirołahaŭ.
Ale ŭ vyniku aŭtar idzie jašče dalej, i źviazvaje hety pahanski idał z ukrainskim pałkom «Azoŭ», jaho kiraŭnikom Andrejem Bileckim i «vučniem» Źbihnieva Bžezinskaha Ramanam Zvaryčam.
Arhumientacyja — «zusim niadaŭna na bazie «Azova» taksama ŭstanavili pahanski idał». Śmiešna, ale svajo rasśledavańnie aŭtar tak i skončvaje: «Supadzieńnie?»
«Naša Niva» źviazałasia z hetaj Ałaj Palikarpuk, jakuju ŭ niehatyŭnym śviecie ŭzhadvaje Life.ru.
Jana skazała, što nie budzie apraŭdvacca i kamientavać domysły durniaŭ, jakija navat nie byli na jaje siadzibie.
Adno što dadała — toj samy drakar, ad jakoha ašaleli rasijskija prapahandysty, nasamreč pabudavany na čužyja hrošy — u ramkach Prahramy raźvićcia AAN.
Na hetyja 15 tysiač dalaraŭ byŭ abvieščany konkurs, sankcyjanavany biełaruskimi ŭładami. U im brali ŭdzieł 16 suiskalnikaŭ. Mety — spryjańnie raźvićciu rehijanalnaha turystyčnaha biznesu.
Ała Palikarpuk
I žančyna vyjhrała konkurs, pabudavaŭšy drakar, prakłaŭšy vieła- i konnyja ściežki, udaskanaliŭšy azdableńnie siadziby.
«A toje, što ŭ Rasii zabaronieny fond, dziakujučy jakomu my pabudavali drakar, — dyk heta ichnija prablemy», — dadała spadarynia Ała.
Jaje siadziba «Na Zarečnaj vulicy» — łaŭreat šmatlikich premij, siudy pryjazdžajuć sotni turystaŭ jak ź Biełarusi, tak i z zamiežža, kab akunucca ŭ anturaž siaredniaviečnaha šlachu «z varahaŭ u hreki».
