Biełaruski dramaturh i režysior Andrej Kurejčyk abviaściŭ pra pačatak pracy nad novym niezaležnym kinaprajektam — paŭnamietražnaj maładziožnaj kamiedyjaj pad rabočaj nazvaj «Partyzanfilm».
Jak paviedamiŭ Kurejčyk na sustrečy z žurnalistami 31 maja, u červieni budzie sabranaja zdymačnaja hrupa, zdymki płanujecca pačać u žniŭni dla vykanańnia ambicyjnaj mety — vyjści ŭ navahodni kinaprakat.
«Ja ŭpeŭnieny, što, kali my paśpiejem vypuścić film da novaha hoda, jon budzie paśpiachovym i całkam akupicca, — skazaŭ scenaryst i režysior karciny Kurejčyk. — Paśla našaha minułaha prajekta «HaraŠ «my ŭličyli ŭsie pamyłki, padličyli ŭsie šyški. Kali pieršy biełaruski niezaležny film my źniali za čatyry dni, to novy budziem zdymać nie mienš za 15, raniej zapuścim markietynh. Zdymki buduć prachodzić u Minsku, Breście i pamiž imi. Mahčyma, paśpiejem navat da «Listapada».
Pavodle słoŭ režysiora, film zadumvajecca jak ekscentryčnaja maładziožnaja kamiedyja, lohkaja, zabijackaja i vielmi chulihanskaja. Jana ab pryhodach troch maładych ludziej u pošukach chutkich i lohkich hrošaj u duchu amierykanskaha «Chłapiečnika ŭ Viehasie», pra toje, jak prahramist, biznesmien i studentka ŭ Biełarusi zdymajuć film pra vajnu.
«Našu krainu pačynajuć usprymać jak niejkuju, chacieŭ skazać, pamyjnicu, ale skažu kinafabryku vajennaha kiniematohrafa Nibyta my bolš ničoha nie ŭmiejem, i heta naš tvar i identyčnaść. A heta niapraŭda, my ŭmiejem mnohaje», — skazaŭ jon.
«Jak zvyčajna my pačynajem biez hrošaj, ale spadziajomsia znajści partnioraŭ, — skazaŭ Kurejčyk. — Budziem šukać srodki taksama ŭ sacsietkach, na płatformie talaka.by».
Pavodle jaho słoŭ, hałoŭnaja meta kamandy kiniematahrafistaŭ — stvaryć u krainie sistemu prakatu niezaležnaha paŭnamietražnaha biełaruskaha kino.
«Chaču, kab naša tvorčaje abjadnańnie haradskich varjataŭ kiniematahrafistaŭ «Biezbusłou arts» raz u hod vypuskała karcinu pra biełarusaŭ i dla biełarusaŭ, kab biełaruskaje niezaležnaje kino prysutničała na šyrokim ekranie», — zajaviŭ režysior.
Aŭtary filma abiacajuć užo ŭ kancy červienia pradstavić publicy skład zdymačnaj hrupy, akcioraŭ i zaćvierdžanuju nazvu.
