«U srodkach masavaj infarmacyi źjavilisia tryvožnyja paviedamleńni pra toje, što ŭ mai 2016 hoda praź Viciebskuju jeparchiju i prarasijskija «patryjatyčnyja» arhanizacyi, što dziejničajuć na terytoryi Biełarusi, hrupa niepaŭnaletnich biełaruskich dziaciej była nakiravanaja ŭ vajenizavanyja trenirovačnyja łahiery na terytoryi Rasii», — havorycca ŭ zvarocie «Havary praŭdu» ŭ prakuraturu.
Dalej aŭtary źviartajuć uvahu na ideałahičnuju prynaležnaść instruktaraŭ i fakty ich udziełu ŭ vajnie.
«Nam dobra viadoma, — pišuć u «Havary praŭdu», — da jakich trahičnych nastupstvaŭ pryviała dziejnaść hetych bajevikoŭ na ŭschodzie Ukrainy. Niama nijakich sumnievaŭ, što «vykładčyki» i «treniery» zhadanych u paviedamleńniach ŚMI łahieraŭ vučyli biełaruskich dziaciej ekstremizmu, nieanacyzmu, zdradzie našaj Radzimie — Biełarusi, nieciarpimaści da ludziej, jakija nie padzialajuć ich pohlady što da adradžeńnia «vialikaj impieryi».
«Rasceńvajem takuju dziejnaść arhanizataraŭ, pasiarednikaŭ, palityčnych i finansavych sponsaraŭ padobnych łahieraŭ jak surjoznuju pahrozu dla maralnaha stanu biełaruskich dziaciej. Ličym dziejnaść relihijnych i hramadskich arhanizacyj, jakija zajmajucca viarboŭkaj dziaciej dla ŭdziełu ŭ padobnych łahierach, niesumiaščalnaj z zajaŭlenymi imi statutnymi metami».
«U suviazi z vykładzienym vyšej, prašu Hienieralnuju prakuraturu Respubliki Biełaruś:
— Pravieści pravierku faktaŭ, vykładzienych u paviedamleńniach ŚMI, ab udziele biełaruskich dziaciej u dadzienych łahierach.
— Dać pravavuju acenku dziejnaści arhanizataraŭ i pasiarednikaŭ dadzienych łahieraŭ ź biełaruskaha boku.
— Zabaranić ujezd u Biełaruś hramadzianam zamiežnych dziaržaŭ, datyčnych da naboru biełaruskich dziaciej dla ŭdziełu ŭ vajenizavanych dziciačych łahierach na terytoryi inšych krain», — značycca taksama ŭ liście za podpisam kiraŭnika kampanii Andreja Dźmitryjeva.