U intervju rasijskamu partału «Tut i tam» pieršaja biełaruskaja Nobieleŭskaja łaŭreatka Śviatłana Aleksijevič pryznałasia, što nadoječy nabyła novuju kvateru ŭ Minsku. «Zaraz tam ramont robiać da kanca», – udakładniła jana.
Jak vyjaviłasia, Śviatłana Aleksijevič nabyła sabie kvateru ŭ žyllovym kompleksie «La Trajeckaha», tak zvanym «domie Čyža». Admietna, što raniej piśmieńnica žyła litaralna ŭ susiednim budynku na toj ža vulicy Staražoŭskaj. Tam ŭ jaje była dvuchpakaŭjoka.
Što za kvateru pryhledzieła sabie Aleksijevič? Piśmieńnica stała haspadyniaj trochpakajovych apartamientaŭ płoščaj kala 125 m2. Dla «doma Čyža» heta nievialikaje žyllo — płošča kvater varjirujecca ad 55 da 500 «kvadrataŭ».
Kvatera kuplałasia ŭ krasaviku 2016 hoda, na toj momant na ŭsie pamiaškańni, jakija «Trajpł» nie paśpieŭ raspradać, Kamitetam dziaržaŭnaj biaśpieki byŭ nakładzieny aryšt.
Tamu Aleksijevič kuplała kvateru na druhasnym rynku žylla. Jak stała viadoma «Našaj Nivie», jaje raniejšym haspadarom byŭ Aleh Hušča, były prezident futbolnaha kłuba «Biełšyna».
Chto byŭ inicyjataram uhody? «Napeŭna, zadavajcie ŭsie pytańni Śviatłanie Aleksijevič, heta budzie pravilna, — zaśmiajaŭsia Aleh Hušča. – Ni ja jaje nie šukaŭ, ni jana mianie. Dla hetaha jość adpaviednyja słužby i ludzi, jakija zajmajucca padboram kvater dla achvotnych».
Kazać pra asablivaści płanirovak u «domie Čyža» nie vypadaje. Zvyčajna heta vialikaja pustaja prastora z dvuma sanvuzłami i dvuma bałkonami. Adździełki taksama niama, haspadar prydumlaje dyzajn sam.
U «domie Čyža» apartamienty takoj samaj płoščy ŭ abjavach na sajtach ahienctvaŭ nieruchomaści kaštujuć $250—300 tysiač. Padčas handlu cana čaściakom źmianšajecca na 10—15%.
Pavodle dadzienych Rejestra cena na nieruchomaść, košt uhody skłaŭ 6,46 miljarda rubloŭ. Pa aficyjnym kursie Nacbanka na toj dzień heta było roŭna $325 tysiač.
* * *
Chto jašče ź viadomych asobaŭ žyvie ŭ «domie Čyža»? Naprykład, spartoŭcy Darja Domračava, Ała Cupier, Anton Kušnir i Ksienija Sankovič.
Taksama nieruchomaść zarehistravanaja na členaŭ siemjaŭ biznesmienaŭ Uładzimira Japryncava, Juryja Aviarjanava, Alaksieja Aleksina, Anatola Ściackieviča-Čabahanava.
* * *
Čytajcie taksama:
Miljon za kvateru. Žychary harhary Čyža: chto jany?
KDB aryštavaŭ dziasiatki kvater u «Domie Čyža», u tym liku žyllo treniera frystajlistaŭ Mikałaja Kazieki
