Złučanyja Štaty Amieryki praciahnuli rašeńnie ab źmiakčeńni sankcyj u dačynieńni da biełaruskich pradpryjemstvaŭ da 31 kastryčnika 2016 hoda.
«Ministerstva finansaŭ ZŠA z ulikam kansultacyj i ŭ kaardynacyi ź Dziaržaŭnym departamientam ZŠA praciahvaje dazvoł na ździajśnieńnie ździełak ź biełaruskimi pradpryjemstvami, jakija padpadajuć pad sankcyi zhodna z ukazam prezidenta ZŠA № 13405. Hety dazvoł nie vyzvalaje zabłakavanuju ułasnaść hetych pradpryjemstvaŭ», — havorycca ŭ paviedamleńni Minfina.
Sankcyi ŭ dačynieńni da šerahu biełaruskich pradpryjemstvaŭ byli ŭviedzienyja na padstavie ŭkaza prezidenta Džordža Buša ad 16 červienia 2006 hoda ŭ suviazi z parušeńniem pravoŭ čałavieka ŭ Biełarusi i z tych časoŭ pieryjadyčna padaŭžalisia. U sankcyjnych śpis uvachodziać «Biełaruski naftavy handlovy dom», kancern «Biełnaftachim», Belneftekhim USA Inc., AAT «Biełšyna», AAT «Hrodna Azot», AAT «Hrodna Chimvałakno», AAT «Łakafarba», AAT «Naftan» i AAT «Połack-Škłovałakno».
29 kastryčnika 2015 hoda Minfin ZŠA pryniaŭ rašeńnie ab častkovym źmiakčeńni sankcyj na paŭhoda (da 30 krasavika 2016 hoda), dazvoliŭšy tranzakcyi. Pry hetym, kali suma ździełki pieravyšaje 10 tysiač dalaraŭ, hramadzianie ZŠA abaviazanyja stavić u viadomaść upraŭleńnie kantrolu zamiežnych aktyvaŭ Dziarždepartamienta. «My zaklikajem biełaruski ŭrad zrabić dadatkovyja pazityŭnyja kroki pa palapšeńni pazicyi ŭ dačynieńni da pravoŭ čałavieka i demakratyi», — zajaŭlaŭ pres-sakratar Dziarždepartamienta ZŠA Džon Kirbi 30 kastryčnika na bryfinhu ŭ Vašynhtonie.
U pačatku listapada 2015 hoda Minsk naviedali dva namieśnika pamočnika dziaržsakratara ZŠA — pa spravach Jeŭropy i Jeŭrazii Brydžyt Brynk i pa pytańniach demakratyi, pravach čałavieka i pracy Robiert Biarščynski. Jany zajavili žurnalistam, što ZŠA mohuć adnavić sankcyi ŭ vypadku paharšeńnia situacyi z pravami čałavieka ŭ Biełarusi, vykazaŭšy pry hetym nadzieju na dalejšaje palapšeńnie biełaruska-amierykanskich adnosin.
