Na aficyjnaj cyrymonii padpisańnia Paryžskaha pahadnieńnia ŭ Ńju-Jorku amierykanski akcior Leanarda Dzi Kaprya zajaviŭ, što niama nijakich padstaŭ sumniavacca ŭ vysnovach navukoŭcaŭ pra toje, što źmianieńnie klimatu — vynik dziejnaści čałavieka. Pra heta paviedamlaje Centr navin AAN.
«U jakaści pasłanca miru ŭ apošnija dva hady ja padarožničaŭ pa ŭsim śviecie i źbiraŭ śviedčańni taho, jak kryzisy mianiajuć pryrodny bałans na našaj płaniecie. Ja bačyŭ takija harady, jak Piekin, jaki zadychajecca ad pramysłovaha zabrudžvańnia», — skazaŭ Leanarda Dzi Kaprya. Jon pryciahnuŭ uvahu da źniščeńnia lasoŭ u Kanadzie i Indaniezii, da pavodak u Indyi i Majami. «U Hrenłandyi i ŭ Arktycy ja byŭ uražany chutkimi tempami rastavańnia staražytnych ledavikoŭ. Usio heta ja bačyŭ na svaje vočy. I ŭsio heta pryviało mianie ŭ žach», — pryznaŭsia znakamity akcior.
Leanarda Dzi Kaprya zaklikaŭ mižnarodnuju supolnaść u imia svaich dziaciej i budučych pakaleńniaŭ spynić dehradacyju navakolnaha asiarodździa. Jon dadaŭ, što dla hetaha nieabchodnaja tolki palityčnaja vola. Amierykanski akcior zaklikaŭ admovicca ad praźmiernaha vykarystańnia vykapniovaha paliva i pierajści da adnaŭlalnych krynic enierhii.
Siońnia ŭ štab-kvatery AAN Hienieralny sakratar AAN Pan Hi Mun abviaściŭ ab adkryćci da padpisańnia Paryžskaha pahadnieńnia. Jon nazvaŭ hetuju padzieju histaryčnaj — urady 171 krainy paviedamili pra hatoŭnaść pastavić svaje podpisy pad Paryžskim pahadnieńniem. Nikoli raniej tak šmat krain nie padpisvali jakoje-niebudź mižnarodnaje pahadnieńnie ŭ adzin dzień.
Pahadnieńnie pa klimacie było pryniata ŭ śniežni 2015 hoda na 21-j Kanfierencyi krain — udzielnic Ramačnaj kanviencyi AAN pa pytańniach źmieny klimatu. Jano vyznačaje normy vykidaŭ parnikovych hazaŭ paśla 2020 hoda i miery pa praduchileńni źmianieńnia klimatu. Pahadnieńnie zaklikana prakłaści šlach da ekałahična ŭstojlivaj budučyni. U im utrymlivajecca abiacańnie ŭtrymać pavyšeńnie hłabalnaj tempieratury na ŭzroŭni 1,5 hradusaŭ Celsija.
Paryžskaje pahadnieńnie pa klimacie nabudzie moc na 30-y dzień paśla taho, jak jaho ratyfikujuć nie mienš za 55 krain, na jakija ŭ sukupnaści prypadaje jak minimum 55% ahulnych vykidaŭ parnikovych hazaŭ.
Pahadnieńnie budzie zastavacca adkrytym dla padpisańnia ŭ Centralnych ustanovach Arhanizacyi Abjadnanych Nacyj u Ńju-Jorku da 21 krasavika 2017 hoda.
