Alaksandr Łukašenka padpisaŭ papraŭki ŭ zakon, jakija ŭvodziać kryminalnuju adkaznaść za ekstremizm, vykarystańnie kaktejlaŭ Mołatava, raspalvańnie sacyjalnaj varažniečy abo roźni, a taksama — uzmacnieńnie žorstkaści pakarańnia dla biełarusaŭ, jakija vajujuć na terytoryi inšych dziaržaŭ. Adpaviedny dakumient byŭ apublikavany na Nacyjanalnym pravavym internet-partale.
Fota maje ilustracyjny charaktar.
Kaktejl Mołatava
U papraŭkach havorka idzie ab kaktejlach Mołatava — «pradmiet, jaki abjadnoŭvaje šklanuju abo inšuju jomistaść, haručaje rečyva i prystasavańnie, jakoje zabiaśpiečvaje ŭzharańnie haručaha rečyva (zapał)». Zabaronienyja jany, vyrab, nabyćcio, zachoŭvańnie i h.d.
Parušalniki pa hetym artykule mohuć być pakaranyja pazbaŭleńniem voli na termin da 2 hadoŭ. A tym, chto ździejśniŭ padobnyja dziejani paŭtorna abo «hrupaj asob pa papiaredniaj zmovie» budzie pahražać pazbaŭleńnie voli na termin da 5 hadoŭ.
Da rasavaj, nacyjanalnaj, relihijnaj varožaści dadałasia «sacyjalnaja»
U artykuł 130 Kryminalnaha kodeksa ŭvodzicca adkaznaść za raspalvańnie sacyjalnaj varožaści abo roźni. Pakarańnie dla parušalnikaŭ praduhledžana ŭ vyhladzie štrafu, aryštu na termin da 6 miesiacaŭ, abmiežavańnia voli na termin da 5 hadoŭ, abo pazbaŭleńnia voli na termin da 5 hadoŭ.
Jurysty miarkujuć, što ŭ našaj sudovaj praktycy hetyja terminy mohuć traktavacca vielmi šyroka.
Z vopytu jurystaŭ, prykmietaj uzbudžeńnia varožaści moža być farmiravańnie i padmacavańnie niehatyŭnaha stereatypu, admoŭnaha vobraza niejkaj hrupy (nacyjanalnaj, relihijnaj, nośbitaŭ movy), a taksama padbuchtorvańnie da hvałtoŭnych dziejańniaŭ u adnosinach da asobaŭ peŭnaj nacyjanalnaści, rasy, relihii abo sacyjalnaj prynaležnaści. Siudy ž možna adnieści raspaŭsiud iłžyvych, tendencyjna padabranych źviestak pra historyju, kulturu, jakija abražajuć etničnuju abo kanfiesijnuju hrupu albo jaje asobnych pradstaŭnikoŭ jak členaŭ hetaj hrupy, jakija ŭtrymlivajuć kiepiki, ahidu ci pahardu da ich.
Ekstremizm
Da ŭniasieńnia papravak u isnujučaj redakcyi Kryminalnaha kodeksa nie było nivodnaj normy, jakaja praduhledžvaje adkaznaść za ekstremizm. Ciapier jany źjavicca.
«Za stvareńnie ekstremisckaha farmiravańnia, za kiraŭnictva im abo jaho strukturnym padraździaleńniem» pahražaje pazbaŭleńnie voli da 7 hadoŭ. Za paŭtornaje parušeńnie hetaha artykuła pakarańnie budzie bolš žorstkim: pazbaŭleńnie voli da 10 hadoŭ.
Za «finansavańnie dziejnaści ekstremisckaha farmiravańnia» taksama budzie pahražać kryminalnaja adkaznaść — pazbaŭleńnie voli da 6 hadoŭ.
Ad kryminalnaj adkaznaści pa hetym artykule płanujuć vyzvalać tych, chto svoječasova paviedamić dziaržorhanam ab dziejnaści ekstremisckaha farmiravańnia.
Akramia taho, budzie pašyrana administracyjnaja adkaznaść za raspaŭsiud infarmacyjnaj pradukcyi z zaklikami da ekstremizmu.
Uzmacnieńnie žorstkaści adkaznaści dla biełarusaŭ na «čužoj» vajnie
Kryminalny kodeks papoŭniŭsia novymi artykułami, jakija dazvolać pryciahnuć da adkaznaści biełarusaŭ, jakija vajujuć na terytoryi inšaj dziaržavy, navat «biez najaŭnaści karyślivaha składnika».
Heta moža karacca pazbaŭleńniem voli na termin da 5 hadoŭ.
Kryminalnaja adkaznaść pahražaje i tym, chto zajmajecca viarboŭkaj dobraachvotnikaŭ — da 10 hadoŭ.
Hetyja dapaŭnieńni ŭklučany ŭ raździeł «Zakliki da dziejańniaŭ, skiravanych na škodu źniešniaj biaśpieki Respubliki Biełaruś, jaje suvierenitetu, terytaryjalnaj niedatykalnaści, nacyjanalnaj biaśpieki i abaronazdolnaści».
U isnujučaj redakcyi Kryminalnaha kodeksa jość dva artykuły, jakija praduhledžvajuć kryminalnuju adkaznaść za ŭdzieł u vajennych dziejańniach na terytoryi inšaj dziaržavy: «Viarboŭka, navučańnie, finansavańnie i vykarystańnie najmitaŭ» i art. 133 «Najmictva». Prymianić hetyja artykuły ŭ dačynieńni da biełarusaŭ, jakija vajujuć na Danbasie, było praktyčna niemahčyma — dla hetaha patrabavałasia dakazać, što jany atrymlivali materyjalnuju ŭznaharodu.
Papraŭki ŭ zakon ŭstupajuć u siłu praz 10 dzion paśla aficyjnaha apublikavańnia.
