Stvaralnik miesiendžara Telegram Pavieł Duraŭ abviaściŭ siarod raspracoŭščykaŭ botaŭ dla hetaha servisu konkurs, pieramožcy jakoha zmohuć atrymać hranty na sumu ad 25 tysiač dalaraŭ.
vk.com
Bot — vytvornaje ad słova «robat» — heta prahrama, jakaja vykonvaje jakija-niebudź dziejańni praz tyja ž interfiejsy, što i zvyčajny žyvy karystalnik (u dadzienym vypadku — praź interfiejsy miesiendžara Telegram).
U pačatku krasavika stała viadoma, što adrazu dźvie najbujniejšyja sacyjalnyja sietki — Facebook i Telegram — zakłapacilisia zapuskam instrumientaŭ dla stvareńnia botaŭ — dla znosin u sacsietkach i ŭdaskanaleńnia štučnaha intelektu.
Jak udakładniajecca ŭ błohu na sajcie miesiendžara, ahulny pamier fondu, ź jakoha buduć vyłučacca hranty, składzie miljon dalaraŭ. Udzielnikam konkursu treba stvaryć praź śpiecyjalnuju prahramu bot, jaki budzie adnačasova chutkim i karysnym dla karystalnikaŭ.
U błohu adznačajecca, što stvaralniki Telegram taksama nie piarečać suprać pieranosu botaŭ ź inšych płatformaŭ, kali heta zroblena jakasna i bot u vyniku całkam upisvajecca ŭ miesiendžar.
Dla taho kab bot pryniaŭ udzieł u konkursie, aŭtaram treba napisać u kanał słužby padtrymki jaho virtualnaje imia z chešteham BotPrize. Apošni termin padačy zajavak — 31 śniežnia biahučaha hoda.
Miesiendžar Telegram stvorany zasnavalnikam sacyjalnaj sietki «UKantakcie» Paŭłam Duravym. Jaho hałoŭnaj admietnaj asablivaściu źjaŭlajecca sistema hłybokaha šyfravańnia paviedamleńniaŭ. Pratakoł pieradačy dadzienych, jaki vykarystoŭvajecca ŭ Telegram, jak śćviardžajecca, vyklučaje mahčymaść pierachopu paviedamleńniaŭ trecimi asobami. Aŭdytoryja servisu aceńvajecca ŭ 100 młn čałaviek.
