Forvard salihorskaha «Šachciora» Mikałaj Januš vyklikany ŭ trenirovačny łahier nacyjanalnaj zbornaj Biełarusi dla padrychtoŭki da tavaryskich matčaŭ z futbalistami Armienii i Čarnahoryi, paviedamili ŭ pres-słužbie asacyjacyi «Biełaruskaja fiederacyja futboła».
Lepšy bambardzir dvuch apošnich čempijanataŭ Biełarusi maje šanc znoŭ zhulać u składzie hałoŭnaj kamandy krainy. Debiut Januša ŭ nacyjanalnaj zbornaj adbyŭsia hod tamu ŭ sparynhu z kamandaj Habona.
U majučych adbycca sustrečach z armianami i čarnahorcami biełarusam nie zmoža damahčy paŭabaronca rasijskaj «Tomi» Pavieł Niachajčyk, jaki atrymaŭ traŭmu, vybyŭšy sa stroju prykładna na paŭtara miesiaca.
Pad kiraŭnictvam hałoŭnaha treniera Alaksandra Chackieviča biełaruskija futbalisty buduć rychtavacca ŭ Minsku z 21 pa 24 sakavika, paśla čaho nakirujucca ŭ Jerevan, dzie 25 sakavika zhulajuć sa zbornaj Armienii. Z armianskaj stalicy zbornaja Biełarusi vylecić u Padhorycu, dzie 29 sakavika adbudziecca sustreča z čarnahorcami.
Hałoŭny trenier maładziožnaj zbornaj Biełarusi (U-21) Ihar Kavalevič paśla niadaŭniaha matču za Supierkubak pamiž BATE i «Šachcioram» vyrašyŭ vyklikać napadajučaha salihorskaj družyny Vitala Lisakoviča. Dla 18-hadovaha ihraka heta pieršaje zaprašeńnie pad ściahi biełaruskaj «maładziožki», jakaja 26 sakavika ŭ polskim horadzie Vrocłavie praviadzie kantrolny matč z polskimi ravieśnikami.
