U stalicy staŭki padatku za zdaču kvater na karotki i doŭhi termin mohuć 1 maja pavialičycca na 15%, kali takoje rašeńnie prymuć deputaty Minharsavieta, paviedamiła 16 sakavika na pres-kanfierencyi namieśnik načalnika inśpiekcyi Ministerstva pa padatkach i zborach pa Minsku Halina Hurynovič.
Jana paviedamiła, što hetkaja prapanova była padadzienaja na hramadskaje abmierkavańnie, jakoje zaviaršyłasia 9 sakavika. «Prajekt rašeńnia z ulikam usich zaŭvah hramadzian pastupiŭ u harsaviet. Ja dumaju, što na najbližejšaj siesii 29 sakavika jon budzie razhledžany, i, mahčyma, deputaty jaho zaćvierdziać. Chutčej za ŭsio, rašeńnie nabudzie moc 1 maja, bo jano pavinna jašče być ŭzhodnienaje ŭ Miniuście», — rastłumačyła Hurynovič.
Kolkaść hramadzian, jakija lehalna zdajuć kvatery ŭnajmy, kožny hod pavialičvajecca na 11-12%: u 2014 hodzie ich było 52 tys., u 2015-m — 59,5 tys. Tolki za studzień—luty 2016 hoda atrymana padatkaŭ ad zdačy kvater 18 młrd. rubloŭ, što na 3 młrd. bolš, čym u 2015 hodzie. «Sa śniežnia 2014 hoda staŭki adzinaha padatku za zdaču kvater nie mianialisia. Jany zaležać ad miescaznachodžańnie kvatery. U Minsku vyznačanyja piać zon. Za pieršuju staŭka składaje 240 tys. rubloŭ u miesiac za adzin pakoj, druhuju — 200 tys., treciuju i čaćviortuju — 170 tys., piatuju — 140 tys.», — paviedamiła namieśnik načalnika.
Jana adznačyła, što ŭ 2015 hodzie było zarehistravana 800 indyvidualnych pradprymalnikaŭ, jakija zajmalisia zdačaj kvater na karotki termin (da 15 dzion). Ad ich pastupiła adzinaha padatku 12,5 młrd. rubloŭ. Na 1 studzienia 2016 hoda zarehistravana 600 IP, jakija zdajuć kvatery na sutki. «Ale zvyčajna da kanca hoda ich kolkaść uzrastaje», — adznačyła Hurynovič. Za studzień—luty jany zapłacili padatki na 2,2 młrd. rubloŭ.
Dla kvater, jakija zdajuć na sutki, vyznačanyja staŭki, što taksama nie mianialisia sa śniežnia 2014 hoda. Dla pieršaj katehoryi (nie bolš za dva pakoi) heta 900 tysiač rubloŭ u miesiac, druhoj (bolš za dva pakoi) — 1 młn. 800 tys., treciaj (adnakvaternyja žyłyja damy) — 2 młn. 800 tys.
