U mienskaj siadzibie Partyi BNF adbyłasia viečaryna pamiaci Alesia Čarkašyna, aktyvista partyi «Biełaruskaja chryścijanskaja demakratyja», prymierkavanaja da paŭhodździa z dnia jahonaj hibieli ŭ bajach za niezaležnaść Ukrainy.
Udzieł u imprezie pryniali niekalki dziasiatkaŭ čałaviek, u tym liku viadomyja biełaruskija palityki i tvorcy.
Adnym ź pieršych słova ŭziaŭ mastak Aleś Puškin, jaki prezentavaŭ svaju vystavu ŭ vyhladzie troch partretaŭ Alesia Čarkašyna. Raniej hetyja partrety Aleś Puškin demanstravaŭ na vystavie ŭ ambasadzie Ŭkrainy ŭ Miensku.
Mastak raspavioŭ pra svaju pajezdku ŭ zonu bajavych dziejańniaŭ i pra sustrečy z bajavymi siabrami i paplečnikami Alesia Čarkašyna. Paet i bard Źmicier Zacharevič pračytaŭ vieršy i praśpiavaŭ pieśni ŭ pamiać zahinułaha patryjota, svaje pieśni taksama vykanali Andrej Mielnikaŭ i inšyja bardy.
Addać daninu pavahi Alesiu Čarkašynu pryjšoŭ palityk Mikoła Statkievič, jaki skazaŭ, što nia byŭ asabista znajomym z Alesiem, ale pryjšoŭ ušanavać jahonuju pamiać:
«Ja pryjšoŭ siudy, kab addać daninu pavahi biełarusu, žaŭnieru, patryjotu, jaki mieŭ ideały i hetak važnyja, što nie zbajaŭsia ryzykavać i addać za ich svajo žyćcio. Tyja biełaruskija chłopcy, jakija pakłali svaje žyćci, jany baranili Biełaruś va Ŭkrainie. Tak mała ludziej, jakija majuć ideały i jašče mienš tych, chto hatovy addać za ich svajo žyćcio. My majem prykład i jon vielmi važny. Hetaja kroŭ nie praliłasia daremna, bo kali za ideałami niama ŭčynkaŭ i achviaraŭ, to heta prosta słovy. Taja relihija, jakaja sfarmavała ŭvieś śviet, była zbudavanaja na achviary Chrysta. Nie było b hetaj achviary — i ničoha b nie było: biez učynkaŭ i biaz płaty za idei — usio słovy, a słovaŭ ciapier šmat. My ž majem prykład hodnaha i mužnaha ŭčynku».
Skulptar Henik Łojka padčas imprezy prezentavaŭ eskiz pomnika Alesiu Čarkašynu, na jakim vyjaŭleny hrafičny partret zmahara, hitara z hilzaj, na jakoj jon ihraŭ, a taksama chryścijanski kryž. Zbor srodkaŭ na vyrab pomnika byŭ taksama jašče adnoj metaj praviadzieńnia viečaryny pamiaci, kaža adzin z arhanizataraŭ imprezy i adzin ź lideraŭ partyi «Biełaruskaja chryścijanskaja demakratyja» Pavał Sieviaryniec:
«Pamiać pra Alesia Čarkašyna — jana vielmi važnaja, bo jon zahinuŭ za našu i vašu svabodu. U toj čas, kali rasiejskich najomnikaŭ, jakija vajujuć za «DNR» chavajuć u nieviadomych mahiłach, tych, chto zahinuŭ za Ŭkrainu i Biełaruś, chavajuć jak hierojaŭ. Alesia Čarkašyna i Michaiła Žyźnieŭskaha ŭ apošni šlach pravodzili sotni ludziej. Heta pakazvaje, što biełarusy ceniać asobu, jakaja addaje svajo žyćcio za inšych. Tamu tyja, chto spryčyniajecca da šanavańnia pamiaci — bardy, mastaki, tyja ludzi, jakija achviarujuć hrošy na pomnik, — jany štodnia stvarajuć biełaruskuju salidarnaść».
Jak paviedamiŭ Pavał Sieviaryniec, ustalavańnie pomnika na mahile Alesia Čarkašyna kaštuje kala čatyroch tysiačaŭ dalaraŭ. Na siońnia sabranaja čaćviortaja častka hetaj sumy, tamu zbor srodkaŭ praciahvajecca.
Aleś Čarkašyn — były staršynia bieraściejskaj haradzkoj arhanizacyi BCHD, vajavaŭ u składzie Dobraachvotnaha ŭkrainskaha korpusu «Pravaha sektaru». 10 žniŭnia byŭ ciažka paranieny ŭ bai pad Biełakamienkaj u Danbasie. Pamior u špitali ŭ Zaparožžy paśla niekalkich tydniaŭ komy va ŭzroście 33 hadoŭ.
