Sajt ej.by nadrukavaŭ novy śpis 200 samych upłyvovych biznesoŭcaŭ krainy. Niečakana na pieršym miescy akazaŭsia hienieralny dyrektar Wargaming Group Ltd. Viktar Kisły. «NN» raskazvaje cikavyja fakty ź bijahrafii biznesoŭca.
Skončyŭ fizfak BDU
Viktaru Kisłamu 39 hadoŭ. Jon minčuk. «U navukovaj łabaratoryi, dzie pracavaŭ moj baćka, stajali kampjutary — staražytnyja, puzatyja. I tam byli pieršyja hulni ŭ vyhladzie kiravańnia karaleŭstvam — prymityŭnyja, nazvaŭ ja ŭžo nie pamiataju, pamiataju, jany byli žudasnyja i strašnyja. Ale ŭ nas pa ich nastalhija. Potym źjavilisia kampjutarnyja kłuby, a ŭ ich užo videahulni: chtości kudyści biažyć, stralaje, kaśmičny karabiel kudyści lacić. Nam, chłapčukam, usim pahałoŭna hetyja hulni vielmi padabalisia, jany zavaražyli cełaje pakaleńnie!» – raskazvaŭ Viktar Kisły.
Na vučobie na fizičnym fakultecie BDU nastajaŭ baćka Viktara, jon ža addaŭ syna ŭ šachmatny hurtok. Baćka Uładzimir Kisły na siońnia źjaŭlajecca adnym z suŭładalnikaŭ Wargaming-a. «Adukacyja vielmi dapamahła nam u płanie madelavańnia i inšaha», — kaža biznesmen. Praŭda, pryznajecca, što adnu ź siesij faktyčna zavaliŭ praz hulniu ŭ «Cyvilizacyju».
Pieršaja hulnia – šachmatnaja partyja na suśvietnaj karcie
Svaju pieršuju hulniu Viktar Kisły pačaŭ raspracoŭvać u 1996 hodzie, kali jamu było 17 hadoŭ. Heta była anłajn-hulnia ŭ šachmaty na karcie śvietu.
«My, piać-šeść studentaŭ, žyli na stypiendyju. Moj baćka troški dapamahaŭ kišennymi hrašyma. Zarobak pieršaha prahramista - $ 25 u miesiac. Pracavali i padzarablali, prosta kab nie pamierci z hoładu. Ale my razumieli, kali zrobim hulniu ŭsich časoŭ i narodaŭ, jana zachopić śviet i tady my razbahaciejem! Ale tady, da 2000-ch, usio trymałasia na entuzijaźmie».
Faktyčna ŭsie hulni Viktara Kisłaha tak ci inakš byli źviazanyja z vajennymi batalijami. «Jašče sa škoły ja zachaplaŭsia vajennaj historyjaj. Pamiatajecie, była takaja sieryja - «Kniha budučych kamandziraŭ», «Kniha budučych admirałaŭ». Ja čytaŭ ich, hladzieŭ šmat filmaŭ pra hramadzianskuju vajnu, Vialikuju Ajčynnuju vajnu i 1812 hod. Vajennaja historyja dapamahła mnie zrazumieć, što niemahčyma pieramahčy adrazu».
Śviet tankaŭ
Pieršym vialikim pośpiecham stała stratehija «Apieracyja Bahracijon», jakaja źjaviłasia ŭ 2007 hodzie. U joj rekanstrujavalisia vajskovyja dziejańni na terytoryi Biełarusi ŭ 1943—1944. Pamiž šachmatami i «Bahracijonam» było jašče z paŭtara tuzina hulniaŭ.
Ale słavu i hrošy Viktaru Kisłamu prynios «Śviet tankaŭ». Heta hulnia prosta zachapiła ŭsiu postsavieckuju, a taksama častku suśvietnaj prastory. Chacia i jana strelnuła nie adrazu. Varta adznačyć, što hulnia pabudavanaja tak, što 75% jaje karystalnikaŭ nie płaciać za ŭdzieł. Ale navat tyja 25%, što hatovyja vykładvać hrošy na prasunutyja akaŭnty i retra-tanki zdolnyja prynosić kampanii ahramadnyja prybytki.
«Ja lublu «tančyki» usioj dušoj. Na maim asabistym rachunku 10 000 bajoŭ. Ja čałaviek nie azartny, ale World of Tanks mianie zaciahvaje. U siarednim ja pravodžu ŭ tankavych batalijach pa 50 hadzin u miesiac», — kaža pra svajo hulniu Viktar Kisły.
Niadaŭna kiraŭnik Biełarusi Alaksandr Łukašenka pryznaŭsia, što ŭ «tanki» lubić hulać jaho małodšy syn Mikałaj. «Tak, u «tankach» siadzić. Ale ŭ jaho abmiežavana. Hadzinu — tanki, paŭtary hadziny muzyki, dźvie hadziny tanki — čatyry hadziny muzyki. Čatyry — ciažka, tamu bolš za hadzinu ŭ tanki nie hulaje», — skazaŭ Łukašenka.
Prybytki i novyja rynki
Vyručka Wargaming-a za 2014 hod pa nieaficyjnych ličbach skłała kala 505 miljonaŭ dalaraŭ. «Zrazumieła, što z-za padzieńnia rasijskaha rubla naša dalaravaja vyručka, miakka kažučy, nie vyrasła», — kaža Kisły. Jon zaŭsiody padkreślivaje, što hety siehmient biznesu vielmi kankurentny i lubaja pamyłka moža pryvieści da niečakanych vynikaŭ, rassłablacca nielha ni ŭ jakim razie.
Kisły kaža, što sakret pośpiechu taksama zaklučajecca ŭ tym, kab nie spyniacca na dasiahnutym, a ŭvieś čas zavajoŭvać novyja rynki. «Skazać, što «Štaty my ŭziali», viadoma, nielha. Na hetym rynku vielmi vysokaja kankurencyja, pryčym nie tolki ŭ hulniach - va ŭsich abłaściach. Ale my atrymali tam niejkuju svaju aŭdytoryju. Heta starejšyja mužyki, jakija vodziać dziaciej u tankavyja muziei, hladziać Discovery Channel. Nastupnaj zadačaj było achapić aŭdytoryju maładziejšuju. Ale heta ŭžo značna składaniej: im užo patrebnyja šutery, im padabajecca hulać na kansolach. U Jeŭropie i ZŠA nam jašče jość kudy raści. A voś u Rasii adbyłosia nasyčeńnie rynku. Znajści ŭ Rasii mužčynu, jaki nie čuŭ pra World of Tanks, napeŭna, užo niemahčyma, chiba što ŭ tajzie».
Samym pierśpiektyŭnych rynkam na siońnia Viktar Kisły ličyć Aziju. Zusim niadaŭna kampanija adkryła pradstaŭnictvy ŭ Paŭdniovaj Karei, Sinhapury, Tajvani, Japonii, a taksama aktyŭna zavajoŭvaje Kitaj. Jość pradstaŭnictva navat u Aŭstralii.
Zarehistravany na Kipry
Varta adznačyć, što štab-kvatera kampanii Wargaming znachodzicca ŭ afšornym Kipry, adnak centry raspracovak raskidanyja pa ŭsim śviecie — ad Minska da Aŭstralii. «My spraŭna płacim ŭsie padatki, aktyŭna prasoŭvajem reputacyju Kipra, ŭnosim svoj układ u raźvićcio hetaj krainy», — kaža Kisły.
«Minsk byŭ i zastajecca sercam Wargaming-a, tamu kazać ab pierajeździe na Kipr nie zusim dakładna. U Minsku raźmieščany najbujniejšy ofis kampanii, dzie całkam stvarajuć suśvietny chit World of Tanks: ad napisańnia koda da arhanizacyi kibierspartyŭnych spabornictvaŭ i prasoŭvańnia prajekta. Uvohule ofis całkam zajmaje 16-paviarchovy budynak i naličvaje kala 2000 čałaviek».
U 2014 hodzie namieśnik dyrektara pa raźvićci STAA «Hiejm Strym» Uładzimir Kisły byŭ uznaharodžany miedalom «Za pracoŭnyja zasłuhi».
