Jašče nie acich skandał vakoł bresckaha inśpiektara DPS Piatručyka, jaki pasłaŭ kiroŭcu na try litary, jak supracoŭniki z pałasatymi pałačkami znoŭ patrapili ŭ stužki navin. Na hety raz adznačylisia inśpiektary z Navahrudka.
Incydent adbyŭsia 8 lutaha kala vioski Arkovičy Navahrudskaha rajona.
Inśpiektary, jakija spynili mašynu minčuka dla, jak jany zajavili, pravierki dakumientaŭ, admovilisia vynosić pastanovu ab administracyjnym spahnańni paśla taho, jak kiroŭca paviedamiŭ im, što zabyŭsia dakumienty i hatovy apłacić štraf na praciahu piaci dzion, jak dazvalaje PVKoAP. Kiroŭca taksama admoviŭsia prajści ŭ aŭtamabil DAI.
Sproba kiroŭcy rastłumačyć supracoŭnikam DAI svaje pravy i normy zakanadaŭstva nie mieła pośpiechu. Pavodle aficyjnaj infarmacyi, kiroŭca «pavodziŭ siabie aburalna».
Adzin ź inśpiektaraŭ lichtarykam raźbiŭ bakavoje škło ŭ aŭtamabili, adčyniŭ dźviery i z dapamohaj svajho naparnika vyciahnuŭ kiroŭcu.
Na minčuka byli nadzietyja kajdanki. Jaho advieźli ŭ Navahrudski RUUS, dzie skłali piać pratakołaŭ - čatyry pa art. 18.18 (kiravańnie transpartnym srodkam asobaj, jakaja nie maje dakumientaŭ, praduhledžanych praviłami darožnaha ruchu) i adzin 23.4 (niepadparadkavańnie zakonnamu rasparadžeńniu ci patrabavańniu słužbovaj asoby pry vykanańni im słužbovych paŭnamoctvaŭ) KoAP.
U paviedamleńni UUS Hrodzienskaha abłvykankama, apublikavanym pad zahałoŭkam «Źbili pychu pravakataru», havorycca, što sud Navahrudskaha rajona pryznačyŭ kiroŭcu pakarańnie ŭ vyhladzie štrafu ŭ pamiery 10 bazavych vieličyń, pry hetym adznačajecca, što pravaparušalnik na pasiedžańnie sudu nie źjaviŭsia.
Adnak śviedka, jakaja jechała ŭ adnoj mašynie ź minčukom, śćviardžaje, što, pa-pieršaje, kiroŭca byŭ na sudzie, a pa-druhoje, byŭ prysudžany jašče i da sutak administracyjnaha aryštu.
Taksama śviedka abviarhaje śćviardžeńnie UUS, što zatrymany akazvaŭ fizičny supraciŭ pry zatrymańni i pryviedzienuju ŭ milicejskim paviedamleńni infarmacyju ab raniejšych sudzimaściach kiroŭcy, nazyvajučy ŭsio heta paklopam i chłuśnioj z boku pravaachoŭnych orhanaŭ.
