Fota ad 28.08.2015, aŭtar Siarhiej Hudzilin
Kanhres demakratyčnych sił projdzie viasnoj 2016 hoda. Adpaviednaje rašeńnie pryniataje 29 śniežnia na pieršym pasiadžeńni arhkamiteta pa praviadzieńni mierapryjemstva, paviedamiŭ BiełaPAN adzin ź jaho ŭdzielnikaŭ, eks-kandydat u prezidenty Uładzimir Niaklajeŭ.
«Najbolš vierahodna, kanhres projdzie viasnoj. Za studzień—luty arhanizavać jaho praviadzieńnie naŭrad ci ŭdasca, tamu najbolš vierahodny čas — viasna 2016 hoda, chutčej za ŭsio, jaje siaredzina», — zajaviŭ Niaklajeŭ, adznačyŭšy, što pažadana pravieści kanhres da Dnia Voli (25 sakavika 1918 hoda była abvieščanaja niezaležnaść BNR, hadavinu hetaj daty apazicyja adznačaje masavymi mierapryjemstvami).
***
17 śniežnia hrupa viadomych pradstaŭnikoŭ kultury i hramadskich dziejačaŭ zaklikała apazicyju da kansalidacyi i praviadzieńnia kanhresu demsił dla vypracoŭki dalejšych dziejańniaŭ. Na nastupny dzień apazicyjnyja palityki Mikałaj Statkievič, Uładzimir Niaklajeŭ i Stanisłaŭ Šuškievič abjavili ab stvareńni arhkamiteta pa padrychtoŭcy kanhresu. U toj ža dzień Statkievič paviedamiŭ BiełaPAN, što ŭ arhkamitet pahadzilisia ŭvajści Źmicier Daškievič, Viačasłaŭ Siŭčyk, Andrej Sańnikaŭ i Hienadź Fiadynič.
U pieršym pasiadžeńni arhkamiteta ŭdzielničali Statkievič, Niaklajeŭ, Šuškievič, Fiadynič, Siŭčyk, a taksama były sudździa Kanstytucyjnaha suda Michaił Pastuchoŭ.
«Pa-pieršaje, nam treba było vyrašyć, ci budziem pravodzić kanhres z udziełam usich demakratyčnych struktur abo tolki tych, chto zhadziŭsia ŭ im udzielničać. Pryniali rašeńnie, što budziem pravodzić kanhres u lubym vypadku. Nielha paŭtaryć pamyłku, jakuju my zrabili pierad prezidenckimi vybarami, nie pravioŭšy kanhres i pajšoŭšy na vybary roznymi kałonami», — skazaŭ Niaklajeŭ.
U toj ža čas, adznačyŭ jon, pytańnie kankretnaha miesca praviadzieńnia kanhresa adkrytaje. «Niahledziačy na libieralizacyju, prablemy z režymam zastajucca. Tym nie mienš vyrašyli pravodzić kanhres u lubym vypadku ŭ Biełarusi. Razhladajem roznyja varyjanty, dzie jaho kankretna pravieści, u zaležnaści ad taho, budzie jon dazvoleny ci nie», — zajaviŭ palityk.
Rehłamient kanhresa na pasiadžeńni byŭ razhledžany tolki ŭ ahulnym vyhladzie. Jon, pavodle słoŭ Niaklajeva, jašče nie prapracavany, a tamu vykłaści jaho pakul nielha.
Palityk adznačyŭ, što na kanhresie pavinna być prademanstravanaja kansalidacyja demakratyčnych sił krainy vakoł adzinaj stratehii dziejańniaŭ. «Nieabchodna jasna adkazać ludziam na pytańnie, što my źbirajemsia rabić u składanaj palityčnaj i ekanamičnaj situacyi, jakaja vymaloŭvajecca ŭ pierśpiektyvie na 2016-ty i nastupnyja hady. Hetuju stratehiju dziejańniaŭ apazicyi treba padrychtavać i vyrazna vykłaści ludziam. Heta było b vyhadna ŭsim udzielnikam demakratyčnaha ruchu Biełarusi, bo skaardynavanaja pazicyja — heta zaŭsiody plus, jaje ludzi usprymajuć z bolšym davieram», — ličyć Niaklajeŭ.
Jon padkreśliŭ, što ŭ apazicyi «jość pytańni, jakija patrabujuć tolki ahulnaha rašeńnia». «Kali b z ahulnym rašeńniem my vyjšli na prezidenckija vybary hetaha hoda, ich vynik byŭ by zusim inšym», — pierakanany palityk.
Pry hetym Niaklajeŭ adznačyŭ, što «jość tyja, chto havoryć, što pra adzinuju stratehiju možna damaŭlacca na sustrečy kiraŭnikoŭ struktur». «Moj vopyt pakazvaje, što heta nie zusim tak. Damoŭlenaści na ŭzroŭni kiraŭnikoŭ parušajucca hetak ža lohka, jak damoŭlenaści chłapčukoŭ u łahiery adpačynku, jakija damovilisia ŭsie razam pajści na rečku, a ŭ vyniku pałova pabiehła ŭ les. Hetyja damoŭlenaści mohuć vykonvacca tolki tady, kali pryniataje kalehijalnaje rašeńnie pa ich abaviazkovym vykanańni ŭsimi apazicyjnymi strukturami. Tolki tady možna damahčysia vyniku. Kali heta nie budzie dasiahnutaje, my pryjdziem i da parłamienckich vybaraŭ raźjadnanymi, i apazicyja stracić apošnija askołki aŭtarytetu, jaki jana maje ŭ krainie», — skazaŭ jon.
