Valutnyja pastupleńni ŭ studzieni—listapadzie skłali 30,16 młrd. dołaraŭ i źnizilisia amal na 9,6 młrd. dołaraŭ u paraŭnańni z anałahičnym pieryjadam 2014 hoda. Pra heta śviedčać apieratyŭnyja źviestki Nacyjanalnaha banka.
U pracentnym vyražeńni valutnyja pastupleńni Biełarusi ŭ studzieni—listapadzie skaracilisia amal na čverć u paraŭnańni z 11 miesiacami minułaha hoda.
Źnižeńnie valutnaj vyručki abumoŭlenaje padzieńniem pastupleńniaŭ ad ekspartu tavaraŭ. Za studzień—listapad vyručka ad ekspartu tavaraŭ skłała 24 młrd. dołaraŭ, što na 8 młrd. dołaraŭ (na 25,1%) mienš u paraŭnańni z hetkim ža pieryjadam 2014 hoda.
Valutnyja pastupleńni ad ekspartu pasłuh u studzieni—listapadzie skłali 5,46 młrd. dołaraŭ i źnizilisia na 1 młrd. dołaraŭ (na 15,3%).
Značnaje skaračeńnie ekspartnaj vyručki Biełarusi ekanamisty tłumačać źnižeńniem popytu ŭ Rasii na tavary biełaruskaj vytvorčaści. Za 11 miesiacaŭ valutnyja pastupleńni z Rasii skłali 11,66 młrd. dołaraŭ — heta na 4,9 młrd. dołaraŭ (na 29,5%) mienš za anałahičny pakazčyk 2014 hoda.
Vyručka ad unutranaha handlu za valutu ŭ studzieni—listapadzie skłała 121,7 młn. dołaraŭ, źniziŭšysia ŭ 4,5 razu. Rezkaje skaračeńnie hetaha pakazčyka analityki tłumačać palitykaj Nacbanka pa dedałaryzacyi ekanomiki.
Viasnoj hetaha hoda rehulatar zabaraniŭ vykarystańnie raźlikaŭ u zamiežnaj valucie za turystyčnyja i strachavyja pasłuhi. Adnačasova z hetym była ŭstanoŭlenaja zabarona na raźliki za paliva na aŭtazapravačnych stancyjach u SKV.
U vieraśni Nacbank pryniaŭ novyja miery pa dedałaryzacyi raźlikaŭ. Zhodna z pastanovaj № 515, jakaja nabyła moc 16 vieraśnia, było zabaroniena vykarystoŭvać zamiežnuju valutu pry ažyćciaŭleńni raźlikaŭ pamiž jurydyčnymi asobami — rezidentami z udziełam rezidentaŭ svabodnych ekanamičnych zon i pry ažyćciaŭleńni raźlikaŭ pa asobnych vidach dahavoraŭ strachavańnia.
