Ruch pa pieršym učastku druhoj kalcavoj aŭtamabilnaj darohi vakoł Minska (MKAD-2) budzie poŭnaściu adkryty 16 śniežnia, paviedamiła pres-sakratar Ministerstva transpartu i kamunikacyj Biełarusi Kaciaryna Hryb.
Ruch adkryvajecca pa čaćviortaj i piataj čerhach druhoj MKAD na ŭčastku ad darohi R-28 Minsk — Maładziečna — Narač da aŭtatrasy M-6 Minsk — Hrodna. Takim čynam, z hetaj daty dla transpartu stanie poŭnaściu dastupnym kala 47 km novaj aŭtadarohi, jakaja złučyła viciebskuju i hrodzienskuju šašy, udakładniła pres-sakratar. «Z puskam ruchu pa pieršym učastku MKAD-2 źjavicca mahčymaść nakiravać tranzitnyja patoki z hrodzienskaha i viciebskaha napramkaŭ u abchod stalicy. Novaja daroha źjaŭlajecca biaspłatnaj i ŭviadzieńnie płaty za prajezd pa joj nie płanujecca», — źviarnuła ŭvahu Kaciaryna Hryb.
Jana kanstatavała, što karystalniki atrymlivajuć kamfortnuju čatyrochpałosnuju šašu z cemientabietonnym pakryćciom, jakoje adpaviadaje sučasnym patrabavańniam. MKAD-2 maje pa dźvie pałasy ruchu ŭ kožnym napramku, masty i puciepravody, jakija raździalajuć transpartnyja patoki, dvuchbakovuju barjernuju aharodžu pa vosi darohi dla vyklučeńnia łabavych sutyknieńniaŭ, sietkavuju aharodžu ad žyvioł uzdoŭž trasy ŭ rajonie lasnych masivaŭ, śvietłavyja tabło dla infarmavańnia vadzicielaŭ ab situacyi na darozie.
Jak padkreśliła pres-sakratar, pieršy etap uźviadzieńnia druhoj kalcavoj byŭ padzieleny na niekalki čerhaŭ. Na pieršych troch raboty byli zavieršany raniej, i 6 kastryčnika adbyłosia ich uračystaje adkryćcio z udziełam kiraŭnika dziaržavy. U cełym budaŭnictva MKAD-2 padzielena na dva etapy. Raboty pa pieršym ź ich ciapier zaviaršajucca. Na druhim etapie płanujecca pabudavać darohu praciahłaściu 41,4 km, jakaja złučyć hrodzienskuju i bresckuju šašy. Hetyja raboty praduhledžvajecca zaviaršyć u 2017 hodzie. Ahulnaja praciahłaść MKAD-2 składzie amal 160 km (novaje budaŭnictva — kala 90 km, a taksama isnujučyja ŭčastki aŭtadaroh M-1/Je30, M-2 i R-80 — 70 km).
