U 2016 hodzie ŭ Minsku płanujecca zakupić 270 novych aŭtobusaŭ i 30 tralejbusaŭ, paviedamiŭ na pres-kanfierencyi 9 śniežnia dyrektar dziaržaŭnaj ustanovy «Staličny transpart i suviaź» Valeryj Škurataŭ.
Pavodle jaho słoŭ, pytańnie abnaŭleńnia transpartu staić vostra, pakolki da 2019 hoda amal uvieś ruchomy sastaŭ padlahaje śpisańniu. Aŭtobusy i tralejbusy słužać 10 hadoŭ pry prabiehu 550 tys. km, tramvai — 15 hadoŭ. «Vy pamiatali hady, kali masava abnaŭlaŭsia transpart, za try hady my poŭnaściu abnavili tramvai. Da 2019 hoda treba budzie zakupić kala adnoj tysiačy aŭtobusaŭ i prykładna 500-600 tralejbusaŭ», — paviedamiŭ dyrektar upraŭleńnia.
«Zadača 2015 hoda była minimalnaja z ulikam vydzielenych srodkaŭ. U 2016 hodzie my płanujem zakupić 270 aŭtobusaŭ i 30 tralejbusaŭ. Čakajem padpisańnia inviestycyjnaj prahramy na nastupny hod, tam na heta buduć zakładzienyja srodki», — skazaŭ Škurataŭ.
Jon taksama adznačyŭ prablemu, źviazanuju z zatrymkaj ruchu transpartu ŭ vyniku DTZ na šlachu jaho ruchu. «My dasiahnuli razumieńnia z DAI, i ich rehłamienty praduhledžvajuć prybyćcio inśpiektaraŭ na razbor DTZ na praciahu 15 chvilin. Ale byvajuć vypadki, kali DTZ zdarajucca masava ŭ roznych rajonach, i časam inśpiektary pryjazdžajuć paźniej», — adznačyŭ Škurataŭ. Što datyčycca aŭtobusaŭ, to «prablem niama — jany abjazdžajuć miesca avaryi». «Z tralejbusami prablema jość, tamu što my kuplajem taki transpart, jaki nie moža abjechać zakrytuju pałasu. Tamu zadača na nastupny hod — kupić 30 tralejbusaŭ, jakija mohuć chadzić aŭtanomna ad 500 mietraŭ da kiłamietra. Tralejbus pavinien mieć mahčymaść choć by abjechać prablemny ŭčastak», — skazaŭ čynoŭnik.
