Zorcy polskaj estrady, viadomaj śpiavačcy Maryli Radovič 8 śniežnia spoŭniłasia 70 hadoŭ. Jaje pieśni ŭ Polščy viedaje kožny. Na scenie Radovič užo 50 hadoŭ.
Jaje karjera pačałasia ŭ 1967 hodzie, kali maładaja śpiavačka atrymała hałoŭnuju ŭznaharodu na Konkursie studenckaj pieśni ŭ Krakavie, piša Polskaje radyjo.
U 70-ch hadach amal kožnaja praśpiavanaja Radovič pieśnia stanaviłasia chitom, a na hetu temu źjaŭlałasia mnostva «zornych» plotak. Da hetaha času vobraz doŭhavałosaj błandynki, jakaja pryvodzić publiku ŭ zachapleńnie svaimi pieśniami, — heta adzin z samych jarkich uspaminaŭ časoŭ PNR.
Siamja baćki Radovič była rodam ź Vilni, tam u ich była ŭłasnaja apteka «Pad lebiedziem». Paśla vajny baćki śpiavački pierajechali ŭ Zialona-Huru, dzie i naradziłasia Maryja Antanina Radovič.
Baćka Radovič naležaŭ da miascovaj elity, byŭ prezidentam horada i dyrektaram pieršaha polskaha liceja. U 1948 kamunistyčnyja ŭłady pasadzili jaho ŭ turmu, dzie jon prabyŭ u źniavoleńni da 1956 hoda.
U starejšaj škole Maryla Radovič vučyłasia va Ŭłacłaŭku, a ŭ stalicu Polščy pryjechała, kab pastupić u VNU. U 1956 hodzie jana pačała vučycca ŭ Akademii fizičnaha vychavańnia, choć pierad hetym sprabavała pastupić u Akademiju pryhožych mastactvaŭ u Hdańsku i na fakultet vieterynaryi ŭ Varšavie. Maładaja studentka maryła vystupać u kłubach i stała vakalistkaj hurtu «Šejtany», u jakoj hrali taksama pradstaŭniki studenckaha braterstva. Ź imi Radovič supracoŭničała jašče šmat hadoŭ.
Kolorowe jarmarki Sopot 1977
Maryla Radovič užo ŭ časy Polskaj Narodnaj Respubliki była zorkaj estrady, ale, jak uspaminaje śpiavačka, kab atrymać kvateru, joj daviałosia prajści taki ž šlach, jak usim astatnim palakam.
Tolki ŭ 1979 hodzie paśla doŭhaha čakańnia Radovič zajechała ŭ kvateru ŭ šmatpaviarchoŭcy na Ursynovie — novym rajonie na ŭskrainie Varšavy. U tym ža hodzie jana była ŭznaharodžana Kavalerskim kryžam Ordena Adradžeńnia Polščy.
Zamiest taho, kab spačyć na łaŭrach samaj viadomaj polskaj śpiavački, Radovič u apošnija hady pracuje jašče bolš intensiŭna, jeździć z kancertami pa ŭsim śviecie, a z 2005 hoda kožny jaje albom stanovicca płacinavym.
Maryla Radovič. Koni privieriedlivyje Vysockaha, pa-polsku
Donatan i Maryla Rodowicz - Pełnia
