MZS Rasii zajaviŭ, što tureckija ŭłady zatrymali, a paśla vysłali z krainy žurnalistaŭ rasijskaha dziaržaŭnaha telekanała «Rasija 1».
Jak havorycca ŭ kamientary viedamstva, členy zdymačnaj hrupy prahramy «Śpiecyjalny karespandent» byli zatrymanyja 7 śniežnia ŭ pamiežnaj ź Siryjaj pravincyi Chataj na paŭdniovym uschodzie Turcyi, kali nakiroŭvalisia ŭ susiedniuju pravincyju Hazijantep.
«Zatrymali nieviadomyja asoby, apranutyja ŭ cyvilnaje, jakija na zakonnaje patrabavańnie žurnalistaŭ admovilisia nazvać svaje imiony i pradjavić dakumienty. Rasijskuju zdymačnuju hrupu pryvieźli ŭ palicejski ŭčastak, dzie paviedamili pra rašeńnie departavać ich z Turcyi na padstavie, jak było zajaŭlena, «parušeńnia praviłaŭ dziejnaści zamiežnych žurnalistaŭ u Tureckaj Respublicy «, — zajavili ŭ rasijskim MZS.
U paviedamleńni na sajcie vesti.ru havorycca, što Ankara admoviłasia dać tłumačeńni taho, što adbyłosia, supracoŭnikam rasijskaha pasolstva. Padrabiaznaści zatrymańnia telekanał abiacaje raspavieści ŭ viačernim vypusku prahramy «Vieści» ŭ aŭtorak.
Turecki bok pakul nie kamientuje incydent.
3 śniežnia tureckija ŭłady ŭviali novyja praviły dopusku rasijskich žurnalistaŭ da pracy na terytoryi krainy. Ciapier usie rabotniki rasijskich ŚMI, jakija nakiroŭvajucca ŭ Turcyju, buduć abaviazanyja afarmlać dazvoł i akredytacyju.
Ci byli vykananyja hetyja patrabavańni zdymačnaj hrupaj «Rasii 1», MZS Rasii i sam telekanał nie ŭdakładniajuć.
