Kandydat u prezidenty na minułych vybarach Taćciana Karatkievič płanuje da pačatku kaladnych i navahodnich śviataŭ ździejśnić vosiem pajezdak pa rehijonach Biełarusi z naviedvańniem 35 vialikich i małych nasielenych punktaŭ.
Jak paviedamlaje pres-słužba kampanii «Havary praŭdu», siońnia pieršy prypynak eks-kandydata ŭ prezidenty byŭ zrobleny ŭ Łahojsku. U handlovym centry ŭ jaje adbyłasia hutarka ab prablemach indyvidualnaha pradprymalnictva, u tym liku na miascovym uzroŭni. Vysłuchaŭšy ludziej, Taćciana Karatkievič paviedamiła pra svaje płany. «Našu prahramu mirnych pieramien padtrymała vielmi šmat ludziej, — adznačyła eks-kandydat. — Nichto nie vieryć u aficyjnyja 4 pracenty, jakija «vypisała» mnie ŭłada. My pierakananyja, što atrymali nie mienš jak miljon hałasoŭ vybarščykaŭ, i heta abaviazvaje ruchacca napierad, nie źnikać paśla prezidenckich vybaraŭ, jak heta adbyvałasia ź niekatorymi inšymi kandydatami».
Razmova pra ŭdzieł u śpisie «TaK! Za mirnyja pieramieny» pad kiraŭnictvam Taćciany Karatkievič u majučych adbycca parłamienckich vybarach pradoŭžyłasia i na miascovym rynku, dzie siarod handlaroŭ byli nie tolki žychary Łahojska, ale i pryjezdžyja z susiednich rajonaŭ. «Ahulnaje ŭražańnie: ludzi niezadavolenyja svaim sacyjalna-ekanamičnym stanoviščam, niezadavolenyja niepavažlivym staŭlenienm ułady da hramadzian krainy i žadajuć pieramien», — adznačajecca ŭ pres-relizie «Havary praŭdu».
Paśla Łahojska Karatkievič pryjechała ŭ Biešankovičy. Na rynku niešmatlikija pradaŭcy i pakupniki taksama skardzilisia, što jak pradprymalniki pa vinie ŭłady znachodziacca ŭ žorstkich ekanamičnych umovach, tak i ŭ ludziej stanovicca ŭsio mienš srodkaŭ. Usim u pravincyi davodzicca realna ekanomić. Vyžyvać ciažka — u Biešankovičach vialikija prablemy z pracaŭładkavańniem. Taćciana Karatkievič taksama pabyvała i ŭ miascovaj rajbalnicy, dzie sustrełasia z pacyjentami i piersanałam.
Zatym Karatkievič adpraviłasia na sustreču z aktyvistami ŭ Viciebsku i Oršy.
