U amierykanskim štacie Paŭdniovaja Dakota za $250 tysiač pradajecca horad-pryvid. Horad Śviet, płoščaj kala šaści akraŭ, raźmieščany ŭ 160 km ad druhoha pa vieličyni horada štata — Rapid-Sici, zajaviła ryełtar Stejsi Manthomiery, paviedamlaje RBK sa spasyłkaj na Reuters.
Foto: facebook.com/stacie.montgomery
Adznačajecca, što horad uklučaje ŭ siabie karčmu, dom z tryma spalniami i budynak byłoj šynamantažnyja majsterni. U košt taksama ŭvachodzić śvidravina i novaja šylda z nazvaj horada, jakuju ŭłady ŭstalavali na miescy raniejšaj, sa śladami kul.
Pavodle jaje słoŭ, upieršyniu jana vystaviła horad-pryvid na prodaž jašče ŭ červieni 2014 hoda za $399 tysiač, ale paśla taho, jak niekalki ździełak pravalilisia, canu horada pryjšłosia źnizić.
Manthomiery adznačaje, što horadam cikaviacca pakupniki nie tolki z ZŠA, ale i ź inšych krain.
Pavodle paviedamleńnia, pik kolkaści nasielnictva horada pryjšoŭsia na 1940 hod, kali ŭ im naličvałasia 40 žycharoŭ. Tady ŭ Śviecie jašče byli paštovaje adździaleńnie i praduktovaja krama.
Apošnimi žycharami Śvieta byli ŭładalnik horada Łens Biensan, jaho žonka i sabaka. Biensan kupiŭ horad u 1998 hodzie, paźniej addaŭ jaho pry razvodzie svajoj žoncy, a ŭ 2012 hodzie vykupiŭ jaho znoŭ. Adnak u 2014 ułasnaść mužčyny pierajšła banku.
Jak viadoma, vosieńniu 2013 hoda ŭ Kalifornii vystavili na prodaž horad-pryvid Sienieka, u jakim u časy «załatoj lichamanki» byŭ znojdzieny samarodak vahoj u 43 uncyi. Košt horada tady acanili ŭ $225 tysiač. U 2014 hodzie ŭ ZŠA pradavali horad-pryvid Džonsanvil u štacie Kaniektykut za $800 tysiač, u 2012-m — horad Bufard u Vajominhu za $100 tysiač.
Harady-pryvidy pradajucca nie tolki ŭ ZŠA. U 2009 u Łatvii vystavili na prodaž haradok Skrunda-1 na zachadzie krainy, dzie ŭ savieckija časy znachodziŭsia režymny abjekt: tam znachodziłasia radyjołakacyjnaja stancyja, u damach žyli vajennyja śpiecyjalisty. Košt zakinutaj ciapier Skrundy-1 ułady Łatvii acanili ŭ €220 tysiač i prapanoŭvali pakupnikam rasterminoŭku.
