Dziakujučy addanaści siabroŭ i kalehaŭ vyjšaŭ z druku zbor tvoraŭ paeta Siarhieja Macina, jaki zahinuŭ va ŭzroście 19 hadoŭ.
Kniha «Mary chmar» składajecca ź vieršaŭ paeta, jakija jon napisaŭ jašče pry žyćci. Jon ža prydumaŭ nazvu, adnak da vydańnia sprava tady nie dajšła.
«Kali ž Siarhieja nie stała, paśla jaho zastalisia adnyja tvory. I pieršym pamknieńniem paśla pryniaćcia faktu, što samoha Siarhieja niama, byŭ impet vydać jaho tvory knihami. Bo sapraŭdy mieć svoj zbornik Siarhiej maryŭ. I byŭ hetaha varty», — raspaviadaje Kasia Hłuchoŭskaja, jakaja adyhrała najvažniejšuju rolu ŭ arhanizacyi vydańnia.
Siabry vyrašyli zrabić usio samastojna — dla siamji Siarhieja nastali ciažkija časy, bo amal adrazu paśla śmierci chłopca syšli z žyćcia jaho babula i dziadula, a maci była vymušanaja chavać usich traich dy stavić pomniki.
«Ludmiła Rubleŭskaja padkazała mnie ideju kraŭdfandynhu — i my pačali źbirać hrošy ź siabroŭ. Kožny davaŭ, kolki moh. Adhukalisia ludzi mnie zusim nieznajomyja… Hrošy davali nastaŭniki ź Liceja BDU, jak Volha Zujeva, byłyja adnakłaśniki Siarhieja, maje adnahrupniki z univiersiteta, našy ahulnyja znajomyja i siabry. Adnak usio adno hrošy źbiralisia vielmi marudna, zrešty, moj baćka dadaŭ na vydańnie pałovu svajho miesiačnaha zarobku i pažadaŭ pabačyć u chutkim časie zbornik na palicach», — kaža Kasia.
Choć Siarhiej pisaŭ i ŭkrainskaj, i na anhlijskaj, i na rasijskaj movach, bolšaść jahonych tvoraŭ - biełaruskamoŭnyja.
Biełaruskuju movu jon nazyvaŭ movaj svajoj dušy, svajho natchnieńnia i ščyraj lubovi.
Redaktaram zbornika na prapanovu Źmitra Višniova stała Halina Dubianieckaja, paetka i žonka paeta Siarhieja Sysa, jaki taksama dapamahaŭ u vydańni i redahavańni knihi.
«Naohuł Siarhiej byŭ vielmi cikaŭnym, prahnym da žyćcia čałaviekam. Jon lubiŭ vandroŭki, pracavaŭ niejki čas na čyhuncy pravadnikom (ale nie zdoleŭ tryvać patrabavańniaŭ machlarstva ŭ pracy - i ŭciok ź ciahnika prosta pasiarod rejsu. Sam žyŭ skuraj vonki i tvory pisaŭ takija samyja», — piša Kasia.
Zaraz hetaja niezvyčajnaja kniha niezvyčajnaha čałavieka šukaje svajho čytača.
Jaje prezientacyi ciaham 2015-2016 hh adbuducca ŭ Licei BDU, novaj kniharni «Halijafaŭ», a taksama ŭ litaraturnych muziejach horada Mienska.
Pieršaja impreza adbudziecca 10 śniežnia u 18:00 u muziei Piatrusia Broŭki (Minsk, vuł. Marksa, 30).
Na prezientacyi vystupiać paety Viktar Žybul, Viktar Łupasin, Źmicier Višnioŭ, Alaksandr Kaljanaŭ b2b Liza Biełkina, hurt «Laŭdans», pradstaŭniki časopisa «Maładość».
Knihu Siarhieja Macina «Mary chmar» možna nabyć u «Akademknizie» i ŭ kniharni «Halijafy».
Pa ŭsich pytańniach prośba źviartacca da Kasi Hłuchoŭskaj — [email protected] ci [email protected]
***
Mary chmar
Mary chmar — nie markotny pryśmierk
U trymcieńni chałodnych zim,
I źnikać na biaźludnaj vyśpie
Nieachvotna taksama im.
Mary chmar - nie raptoŭny viecier,
Što ŭ biaskoncaść uparta mknie,
I na vysachłyja sukviećci
Doždž zapoźnieny nie linie.
Mary chmar zrazumieć niaprosta,
Ale sutnaść usio adna:
Z uvilhotnienaha pahosta
Kvietki mknuć dahary zdaŭna.
Siarhiej Macin. Miaža Ukrainy i Rumynii, 30.06.2012
…Ci paśpiejem svaje patajemnyja mary
My pradstavić na sud paspality?..
Da apošniaha ŭzdychu, nibyta Ikary,
Budziem rušyć uzorami litar.
Siarhiej Macin. Baranavičy, 31.03.2013
