Ekipaž adździeła DAI Žytkavickaha RAUS 15 listapada pieraśledavaŭ aŭtamabil, kiroŭca jakoha admoviŭsia spynicca.
Jak paviedamiła načalnik adździaleńnia pa ahitacyi i prapahandzie DAI UUS Homielskaha abłvykankama Volha Raźviakava, ekipaž DAI nios słužbu pa arhanizacyi biaśpieki darožnaha ruchu i achovy hramadskaha paradku na aŭtadarozie miaža Rasijskaj Fiederacyi — Homiel — Kobryn u rajonie pavarotu na viosku Dziedaŭka. Prykładna ŭ 16.10 uvahu supracoŭnikaŭ DAI pryciahnuŭ aŭtamabil «Folksvahien-Šaran», jaki ruchaŭsia z boku vioski i staŭ rezka razvaročvacca pasiaredzinie darohi, paśla taho jak kiroŭca lehkavoha aŭtamabila ŭbačyŭ milicyjanieraŭ.
Narad darožna-patrulnaj słužby pačaŭ pieraśled inšamarki. «Kiroŭca, nie reahujučy na nieadnarazovyja patrabavańni supracoŭnikaŭ DAI spynicca, jakija padavalisia praz hučnahavaryciel, praciahvaŭ ruch, padviarhajučy žyćcio i zdaroŭje hramadzian niebiaśpiecy, pry hetym pavialičyŭšy chutkaść ruchu, źmianiajučy napramak ruchu z boku ŭ bok i nie dajučy siabie abahnać. Pavilaŭšy pa vułačkach vioski Dziedaŭka, parušalnik znoŭ nakiravaŭsia ŭ bok aŭtadarohi. Za miežami nasielenaha punkta supracoŭniki milicyi pryniali rašeńnie ab vykarystańni ahniastrelnaj zbroi, bo kiroŭca «Folksvahiena» svaimi dziejańniami stvaraŭ realnuju pahrozu žyćciu i zdaroŭju inšych udzielnikaŭ darožnaha ruchu», — skazała načalnik adździaleńnia.
Paśla papieradžalnaha vystrału ŭ pavietra prahrymieli prycelnyja vystrały pa kołach aŭtamabila. Tolki paśla paškodžańnia troch kołaŭ aŭtamašyna spyniłasia.
«Kiroŭca nie hublaŭ nadziei ŭciačy ad pradstaŭnikoŭ zakona i nakiravaŭsia ŭ les, ale jaho nahnali supracoŭniki DAI. Paźniej stała viadoma, što za rulom aŭtamabila byŭ 42-hadovy žychar vioski Baravaja Žytkavickaha rajona. Inśpiektary DAI dastavili parušalnika ŭ balnicu dla miedahladu, adnak toj ad jaho admoviŭsia», — adznačyła pradstaŭnik DAI.
U dačynieńni da kiroŭcy składziena siem administracyjnych pratakołaŭ za parušeńni PDR, u tym liku za kiravańnie transpartam u stanie ałkaholnaha apjanieńnia i nievykanańnie nieadnarazovych patrabavańniaŭ ab spynieńni, što paciahnuła pieraśled supracoŭnikami RAUS. Rychtujucca materyjały dla raspačynańnia kryminalnaj spravy za kiravańnie aŭtamabilem u niećviarozym stanie paŭtorna na praciahu hoda.
