Biełaruskaja čyhunka arhanizuje śpiecyjalnyja miescy dla kureńnia, na astatniaj terytoryi vakzalnych kompleksaŭ kureńnie zabaronienaje, paviedamili ŭ pres-słužbie BČ.
«Dla vyrašeńnia šerahu prablemnych pytańniaŭ, źviazanych z uździejańniem tytuniovaha dymu na navakolnych, sanitarnym stanam abjektaŭ, łakalizacyjaj krynic mahčymaha ŭzharańnia, pa inicyjatyvie Biełaruskaj čyhunki sumiesna z pradstaŭnikami ministerstvaŭ pa nadzvyčajnych situacyjach, achovy zdaroŭja, unutranych spraŭ byli vyznačanyja ŭmovy stvareńnia i patrabavańni da abstalavańnia miescaŭ dla kureńnia na adkrytym pavietry na terytoryi vakzalnych kompleksaŭ», — adznačyła pres-słužba.
U paradku ekśpierymientu na 19 vakzałach (Minsk, Orša, Barysaŭ, Maładziečna, Baranavičy, Hrodna, Lida, Łuniniec, Brest, Pinsk, Homiel, Žłobin, Kalinkavičy, Mahiloŭ, Babrujsk, Asipovičy, Kryčaŭ, Viciebsk, Połack) arhanizujucca miescy dla kureńnia na adkrytym pavietry. Adnačasova praduhledžanaje praviadzieńnie infarmacyjnaj pracy i ŭzmocnieny kantrol z boku adpaviednych kampietentnych orhanaŭ.
Akramia taho, na vakzałach pry sadziejničańni Ministerstva achovy zdaroŭja praduhledžanaje praviadzieńnie infarmacyjnych akcyj pra škodu kureńnia.
BČ papiaredžvaje pasažyraŭ, što kureńnie ŭ zabaronienych miescach źjaŭlajecca administracyjnym pravaparušeńniem i ciahnie nakładańnie štrafu ŭ pamiery da čatyroch bazavych vieličyń (720 tysiač rubloŭ).
