Prezident Katałonii Artur Mas, EPA
Parłamient Katałonii uchvaliŭ rezalucyju ab niezaležnaści aŭtanomnaj vobłaści. Siarod tych, chto padtrymaŭ dakumient — kaalicyja «Razam «Za» i «Kandydaty za narodnaje adzinstva», jakija vałodajuć bolšaściu ŭ 135-miascovym parłamiencie. Narodnaja partyja Katałonii, partyja «Hramadzianie», a taksama katałonskija sacyjalisty vykazalisia suprać rezalucyi.
Dakumient, u jakim abviaščajecca «pačatak pracesu stvareńnia niezaležnaj dziaržavy Katałonija ŭ vyhladzie respubliki», byŭ uzhodnieny niezaležnickimi ruchami 27 kastryčnika.
Rezalucyja praduhledžvaje, što na praciahu 18 miesiacaŭ buduć sfarmavanyja roznyja dziaržstruktury, a taksama padrychtavany tekst novaj kanstytucyi.
Pa vynikach daterminovych vybaraŭ u Katałonii, što prajšli 27 vieraśnia, pieramohu atrymała «Razam «Za». Tym nie mienš kaalicyja nie zmahła zaručycca padtrymkaj absalutnaj bolšaści, atrymaŭšy tolki 62 mandaty. U suviazi z hetym «Razam «Za» vyrašyła ŭstupić u sajuz z «Kandydatami za narodnaje adzinstva», jakija majuć 10 miescaŭ u parłamiencie.
Roŭna hod tamu — 9 listapada 2014 — u Katałonii prajšło apytańnie nasielnictva ab suvierenitecie, jakoje zatym byŭ pryznana supiarečnym kanstytucyi krainy.
Rezalucyja ab niezaležnaści Katałonii «nie budzie mieć nastupstvaŭ». Pra heta zajaviŭ staršynia ŭrada Ispanii Maryjana Rachoj.
Premjer taksama paabiacaŭ abskardzić dadzienaje rašeńnie ŭ kanstytucyjnym sudzie. Akramia taho, Rachoj adznačyŭ, što ŭžo abmierkavaŭ katałonskaje pytańnie ź lidaram apazicyjnaj Ispanskaj sacyjalistyčnaj rabočaj partyi Piedra Sančasam, ź jakim jany damovilisia pravieści ŭ aŭtorak sustreču.
