Sienat Jeŭrapiejskaha humanitarnaha ŭniviersiteta (EHU) sklikańnia 2015/2016 navučalnaha hoda na pasiadžeńni 28 kastryčnika rekamiendavaŭ rektaru VNU pačać praceduru aficyjnaha padpisańnia Vialikaj univiersiteckaj chartyi. Ab hetym paviedamlaje pres-słužba VNU.
Paśla razhladu zajaŭki EHU rektar univiersiteta budzie zaprošany na ŭračystuju cyrymoniju padpisańnia chartyi, jakaja projdzie vosieńniu 2017 hoda ŭ Bałońni (Italija).
«Fakt pryniaćcia Jeŭrapiejskim humanitarnym univiersitetam Vialikaj chartyi śviedčyć ab usioabdymnaj i histaryčnaj prychilnaści ŭniviersiteta da pravoŭ čałavieka, svabody dumki i samych vysokich standartaŭ sapraŭdy svabodnaj adukacyi», — adznačyŭ rektar EHU Devid Polik.
Staršynia sienata ŭniviersiteta prafiesar-emieryt Ryhor Miniankoŭ ličyć, što dałučeńniem da chartyi EHU demanstruje svaju prychilnaść da «jeŭrapiejskich humanistyčnych kaštoŭnaściaŭ» i «imknieńnia ŭsio bolš arhanična i dynamična ŭklučacca ŭ najnoŭšyja pracesy raźvićcia vyšejšaj adukacyi». «I hetym my taksama paćviardžajem, što biełaruskija ŭniviersitety mohuć zaniać svajo hodnaje miesca ŭ suśvietnaj univiersiteckaj supolnaści, vykonvajučy normy akademičnaj svabody i akademičnaj aŭtanomii», — skazaŭ jon.
Vialikaja chartyja ŭniviersitetaŭ (Magna Charta Universitatum) — heta dekłaracyja asnovatvornych pryncypaŭ akademičnych svabod, etyki i jakaści, jakaja była padpisana 388 rektarami i kiraŭnikami ŭniviersitetaŭ 18 vieraśnia 1988 hoda padčas śviatkavańnia 900-hodździa Bałonskaha ŭniviersiteta. Ciapier padpisantami chartyi źjaŭlajucca 802 univiersitety z 85 krain. EHU prymie dakumient pieršym siarod pryvatnych univiersitetaŭ Litvy i druhim siarod biełaruskich VNU (pieršym byŭ Mižnarodny ŭniviersitet «MIPSA»).
Jeŭrapiejski humanitarny ŭniviersitet byŭ zasnavany ŭ Minsku ŭ 1992 hodzie prafiesaram Anatolem Michajłavym, jaki staŭ jaho pieršym rektaram. U 2004 hodzie biełaruskija ŭłady, niezadavolenyja samastojnaściu kiraŭnictva EHU, zakryli VNU, a praz hod jana adnaviła pracu ŭ Vilniusie. EHU źjaŭlajecca litoŭskaj VNU, ale maje niefarmalny status biełaruskaha ŭniviersiteta ŭ vyhnańni. Jaho finansuje kaalicyja mižnarodnych donaraŭ, jakija padtrymlivajuć EHU jak alternatyvu dziaržaŭnym VNU Biełarusi.
Sienat źjaŭlajecca kalehijalnym orhanam praŭleńnia EHU, jaki funkcyjanuje na asnovie oksbrydžskaj madeli akademičnaha samakiravańnia. Členami sienata źjaŭlajucca ŭsie vykładčyki EHU, jakija majuć navučalnuju nahruzku ad 0,75 staŭki i vyšej, a taksama piać členaŭ studenckaha pradstaŭnictva. Pasiadžeńni sienata EHU adkrytyja i prachodziać štomiesiac.
