ZŠA dasiahnuli pahadnieńnia pa damovie ab Tranścichaakijanskim partniorstvie (Trans-Pacific Partnership), paviedamlajecca na sajcie handlovaha pradstaŭnictva ZŠA.
Heta najbujniejšaje za 20 hadoŭ handlovaje pahadnieńnie, adznačaje Bloomberg. Damova praduhledžvaje stvareńnie zony svabodnaha handlu ŭ Azijacka-Cichaakijanskim rehijonie. ZŠA padpišuć dakumient z 11 krainami: heta Japonija, Novaja Ziełandyja, Vjetnam, Kanada, Aŭstralija, Małajzija, Pieru, Bruniej, Sinhapur, Čyli i Mieksika.
Zona svabodnaha handlu, praduhledžanaja damovaj, achopić 40% suśvietnaha handlu, piša Bloomberg. Ahienctva adznačaje, što heta pahadnieńnie było adnoj z hałoŭnych metaŭ prezidenta ZŠA Baraka Abamy ŭ ekanomicy i źniešniaj palitycy. Damova i stvareńnie zony svabodnaha handlu razhladajecca jak mahčymaść supraćstajać Kitaju.
Pahadnieńnie ahavorvaje pytańni inviestycyj i finansaŭ, supracoŭnictva ŭ mytnym rehulavańni, pravoŭ na intelektualnuju ŭłasnaść i inšych śfier.
Prezident ZŠA Barak Abama, kamientujučy pahadnieńnie, zajaviŭ, što jano dazvolić amierykanskim rabočym i biźniesmienam dasiahnuć pośpiechu, jakoha jany zasłuhoŭvajuć, pieradaje Reuters. Pahadnieńnie pavinna taksama prajści praceduru ŭzhadnieńnia ŭ Kanhresie ZŠA, dadaje ahienctva.
