Pieramožnyja paviedamleńni Hienštaba pra pośpiechi rasijskaj avijacyi ŭ Siryi vielmi nahadvajuć zvodki Saŭinfarmbiuro pieršych dzion Vialikaj Ajčynnaj vajny.
Voś, naprykład, što paviedamlałasia 23 červienia 1941 hoda: «Usie ataki praciŭnika na Uładzimir-Vałynskim i Brodskim kirunkach byli adbityja ź vialikimi dla jaho stratami. Na Šaulajskim i Rava-Ruskim kirunkach praciŭnik, jakija ŭkliniŭsia z ranicy ŭ našu terytoryju, u druhoj pałovie dnia kontratakami našych vojskaŭ byŭ raźbity i adkinuty za dziaržmiažu; pry hetym na Šaulajskim kirunku našym artahniom źniščana da 300 tankaŭ praciŭnika… Naša avijacyja viała paśpiachovyja bai, prykryvajučy vojski, aeradromy, nasielenyja punkty i vajennyja abjekty ad pavietranych napadaŭ praciŭnika i sadziejničajučy kontratakam naziemnych vojskaŭ. U pavietranych bajach i ahniom zienitnaj artyleryi na praciahu dnia na našaj terytoryi źbity 51 samalot supiernika; adzin samalot našymi źniščalnikami pasadžany na aeradrom u rajonie Minska. Za 22 i 23 červienia nami ŭziata ŭ pałon kala piaci tysiač hiermanskich sałdat i aficeraŭ».
A voś što paviedamlajuć siońnia pra Siryju. Za pieršyja try dni bajoŭ rasijskaja avijahrupa ŭ Siryi ździejśniła 60 bajavych vyletaŭ i źniščyła 50 abjektaŭ terarystaŭ «Isłamskaj dziaržavy». Načalnik hałoŭnaha apieratyŭnaha ŭpraŭleńnia Hienštaba hienierał-pałkoŭnik Andrej Kartapołaŭ zajaviŭ: «Udary nanosilisia kruhłasutačna z avijabazy «Chmiejmim» na ŭsiu hłybiniu terytoryi Siryi. Za troje sutak nam udałosia padarvać materyjalna-techničnuju bazu terarystaŭ i istotna źnizić ich bajavy patencyjał… Vyviedka fiksuje, što bajeviki pakidajuć kantralavanyja imi rajony… U ich šerahach pačałasia panika i deziercirstva. Kala 600 najmitaŭ pakinuli svaje pazicyi i sprabujuć vybracca ŭ Jeŭropu (heta kab jeŭrapiejcaŭ papałochać. — B.S.)». Udary pry hetym, viadoma, byli tolki kropkavyja, i źniščała vyklučna kamandnyja punkty, składy, u tym liku z «pajasami šachidaŭ» (jakija ŭ Siryi nie vykarystoŭvajucca — B.S.), łahiery i bajavaja technika terarystaŭ.
Uvohule, za try dni rasijskaja avijacyja ŭsiaho 60 vyletami damahłasia taho, čaho mižnarodnaja kaalicyja na čale z ZŠA nie zdoleła dasiahnuć za hod baraćby, ździejśniŭšy bolš za 7 tysiač vyletaŭ suprać abjektaŭ ID. Viedaj našych!
Usie hetyja bravyja spravazdačy, zrazumieła, mieli i majuć vielmi mała ahulnaha z rečaisnaściu. Nakont pieršych dzion Vialikaj Ajčynnaj tłumačyć niama patreby. A z nahody zvodak ab Siryi zaŭvažu, što, jak śviedčać źmieščanyja tam naziralniki, z 60 rasijskich nalotaŭ tolki adzin pryjšoŭsia pa abjekcie «Isłamskaj dziaržavy» — jaho stalicy Rakie, dy i to zakranuŭ u asnoŭnym mirnaje nasielnictva. Astatnija ž naloty byli nakiravanyja suprać abjektaŭ umieranaj isłamskaj apazicyi, jakaja i ŭjaŭlaje najbolšuju niebiaśpieku dla Asada, pakolki karystajecca padtrymkaj ZŠA i amierykanskich sajuźnikaŭ. I achviarami hetych nalotaŭ taksama stała hałoŭnym čynam hramadzianskaje nasielnictva. Sprava ŭ tym, što rasiejskaja avijacyja ŭ asnoŭnym vykarystoŭvaje niekiravalnyja bomby i rakiety, nakštałt fuhasnych FAB-250. Užyvajucca i kiravanyja rakiety Ch-29Ł z łaziernym naviadzieńniem. Ale jany efiektyŭnyja tolki z paraŭnalna nievialikich vyšyń, na jakich samalot moža być źniščany najaŭnymi ŭ paŭstancaŭ srodkami SPA, zachoplenymi ŭ siryjskaj i irakskaj armij. Akramia taho, hetaja rakieta vielmi adčuvalnaja da nadvorja i nieefiektyŭnaja suprać zamaskiravanych celaŭ. Tak, u Čačni, dzie pieravažaje pachmurnaje nadvorje, prymianieńnie Ch-29Ł abmiežavałasia čatyrma puskami. Dziejničać ža ź nievialikich vyšyń rasiejskim piłotam naŭrad ci dazvolać. Pucinu zusim nie treba, kab pałonnych rasijskich lotčykaŭ potym demanstravali na ŭvieś śviet. Kali vieryć siryjskaj apazicyi, adzin z rasijskich samalotaŭ užo byŭ źbity. Ale daviedacca, ci tak heta, my zmožam nie chutka. Rasijskija straty zasakrečanyja, i pryznavać fakt źniščeńnia samalota abo viertalota Maskva budzie tolki tady, kali ŭ rukach praciŭnika apynucca pałonnyja ź jaho ekipaža.
Abjekty ŭ ID i inšych hrupovak, jakija zmahajucca suprać Asada, nie prosta kropkavyja, a supierkropkavyja. U ich niama samalotaŭ i aeradromaŭ, vielmi mała tankaŭ, broniemašyn i artyleryi, i vykarystoŭvajucca jany adzinkava. Składy taksama nievialikija i razhrupavańnia. A lidary hrupovak i palavyja kamandziry pastajanna mianiajuć svajo miescaznachodžańnie. Paŭstancy dziejničajuć nievialikimi padraździaleńniami ŭ niekalki dziasiatkaŭ čałaviek. Atrady ŭ niekalki socień čałaviek stvarajucca na karotki čas dla napadaŭ na kankretnyja mety. Dla taho, kab nanosić efiektyŭnyja avijaŭdary pa ŭsich hetych pastajanna źmianiajučych svajo stanovišča abjektach, nieabchodnyja apieratyŭnyja dadzienyja ahienturnaj vyviedki. A takich ahientaŭ u Asada na kantralavanych paŭstancami terytoryjach amal nie zastałosia. Ałavitaŭ tam albo zabivajuć, albo vyhaniajuć, a inšaj apory ŭ siryjskaha dyktatara niama.
Kali b ID možna było pieramahčy avijanalotami, heta daŭno b zrabiła kaalicyja, jakuju ŭznačalvaje ZŠA. U jaje i samalotaŭ značna bolš, čym u rasijskaha kantynhientu i VPS Asada razam uziatych, i sistemy naviadzieńnia lepšyja. Ale pakul što pośpiechi sajuznaj avijacyi davoli ścipłyja — nijakaha pierałomu ŭ baraćbie ź isłamistami jana nie dasiahnuła. I Pucin napeŭna razumieje, što adnymi samalotami vajnu ŭ Siryi nie vyjhrać. Prablema Asada nie ŭ niedachopie avijacyjnaj padtrymki, a ŭ vostrym niedachopie sałdat. Z 320-tysiačnaj davajennaj siryjskaj armii ŭ jaho zastałosia nie bolš za 120 tysiač čałaviek, pryčym da pałovy ź ich — heta ałavitskija apałčency. Z sajuźnikaŭ ŭ siryjskaha prezidenta tolki niekalki tysiač bajcoŭ «Chiezbały», jakija taksama panieśli ciažkija straty. Kolkaść hrupovak, jakija supraćstajać Asadu, nieviadomaja, ale, imavierna, u sukupnaści jany nie mienšyja za ŭradavuju armiju. Resursy ža papaŭnieńnia ŭ ich nieparaŭnalnyja. Ałavity — heta tolki 10-15% nasielnictva Siryi, a araby-sunity, jakija składajuć jadro apazicyjnych hrupovak, — bolš za 50%. Nie vyklučana, što z-za vialikich strat u Asada adčuvajecca niedachop svaich lotčykaŭ, i jon paprasiŭ Pucina dasłać nie tolki samaloty, ale i rasijskich piłotaŭ. Darečy, siryjskija lotčyki ŭ hetaj vajnie pavinny być bolš efiektyŭnyja za rasijskich, tamu što jany viedajuć miascovaść. A dla taho, kab tolki zachavać tyja 20% terytoryi Siryi, jakija ciapier kantraluje Asad, chutčej za ŭsio, spatrebicca padmacavać jaho nie mienš čym 10-15 tysiačami rasijskich sałdat.
Ale Pucin pakul što vidavočna nie hatovy da naziemnych apieracyj u Siryi. Dla taho ž, kab pasprabavać adnavić kantrol Asada nad usioj krainaj, mahčyma, mała budzie i 100-tysiačnaj hrupoŭki. Tamu siryjskaja avantura Pucina vyhladaje sprobaj nie hetulki praduchilić vajennaje paražeńnie Asada, kolki nacisnuć na Zachad, kab damahčysia sastupak pa siryjskim i ŭkrainskim pytańniach. Sama pa sabie prysutnaść rasijskich samalotaŭ u siryjskim niebie ŭskładniaje pracu avijacyi sajuźnikaŭ, pakolki pavialičvaje ryzyku sutyknieńniaŭ u pavietry. U toj ža čas, kali samaloty sajuźnikaŭ buduć abstralanyja rasijskimi samalotami, heta moža być tolki pravakacyjaj Maskvy. Bo dobra viadoma, što ŭ ID i inšych paŭstancaŭ avijacyi niama.
Pucin moža syści ź Siryi ŭ luby momant, kali pažadaje. Tamu rasijskaja prapahanda i ŭvichajecca, pierakonvajučy publiku, što rasiejskaja avijacyja ŭ try dni pierałamała chrybiet ID. Heta kab prezident Rasii ŭ luby momant moh abviaścić, što misija vykanana i lotčykaŭ možna viartać dadomu. A potym siryjskija ŭradavyja vojski praviaduć pakazalny nastup, adbiŭšy ŭ paŭstancaŭ toj ci inšy nievialiki horad. Jany byli zdolnyja na heta i da rasijskaj interviencyi, adnak utrymać zachoplenaje doŭha nie ŭ stanie z-za niedachopu sił. Ale, jak i pierad pačatkam rasijskich bambavańniaŭ režym Asada znachodziŭsia ŭ ciažkim, ale jašče daloka nie bieznadziejnym stanoviščy, tak i ich spynieńnie nie pryviadzie da jaho nieadkładnaha padzieńnia. Bolš za toje, atrymlivajučy rasiejskuju zbroju, Asad moža trymacca doŭha. I ŭ lubym vypadku jaho padzieńnie zapatrabuje vajennaj interviencyi kaalicyi na čale ZŠA, pakolki pry sychodzie ciapierašniaha siryjskaha prezidenta vialikaja ryzyka raźni i departacyi siryjskich mienšaściaŭ — ałavitaŭ, chryścijan, druzaŭ. Adnak takaja interviencyja niemahčymaja pry ciapierašnim amierykanskim prezidencie, jakaja adčuvaje mistyčny strach pierad amierykanskim vajskovym umiašańniem dzie b tam ni było i nie maje nijakaj stratehii na Blizkim Uschodzie. Tamu siryjski kanflikt budzie ciahnucca jašče doŭha.
