V Mižnarodny forum teatralnaha mastactva «TEART» adkryŭsia 29 vieraśnia na scenie Biełaruskaha respublikanskaha teatra junaha hledača ŭ Minsku.
Hety forum źjaŭlajecca nie tolki teatralnym śviatam Biełarusi, ale i «vialikaj padziejaj dla dušy», zaznačyła na cyrymonii adkryćcia «TEARTA» pieršy namieśnik ministra kultury Iryna Dryha. «Dla majstroŭ teatra heta mahčymaść pahladzieć na pracu svaich kaleh ź blizkaha i dalokaha zamiežža, abmianiacca idejami, a samaje hałoŭnaje — pakazać kaleham dasiahnieńni našaha nacyjanalnaha teatralnaha mastactva», — skazała jana.
Dryha začytała haściam adkryćcia fiestyvalu pryvitalnaje słova ministra kultury Barysa Śviatłova, u jakim toj zaznačyŭ, što «dziakujučy forumu «TEART» kožny hod vosieńskaj paroj Minsk pieratvarajecca ŭ sapraŭdny teatralny centr, dzie «čaroŭny śviet sceny raskryvajecca va ŭsioj raznastajnaści, a teatralnaja mova ŭražvaje svaimi raniej nieviadomymi mastackimi mahčymaściami». Ministr źviarnuŭ uvahu na toje, što z kožnym hodam kolkaść biełaruskich teatraŭ, jakija biaruć udzieł u forumie, uzrastaje.
U svaju čarhu staršynia praŭleńnia AAT «Biełhazprambank» Viktar Babaryka nahadaŭ, što ŭ roznyja hady bank padtrymlivaŭ roznyja prajaŭleńni teatralnaha mastactva, u tym liku fiestyval «Panarama» i «Tydni z «Biełhazprambankam».
«Mnie zdajecca, ahulnaje va ŭsich hetych rečach — my ŭvieś čas sprabavali <…> danieści pasłańnie, — skazaŭ kiraŭnik banka. — U pryncypie, teatr — heta pasłańnie akcioraŭ, režysioraŭ, dramaturhaŭ hledaču… Pieršyja fiestyvali byli vielmi ciažkija, tamu što biełaruski hladač ubačyŭ niepryvyčny dla jaho teatr. Siońnia ja kažu vialiki dziakuj biełaruskamu hledaču za toje, što jon heta pasłańnie pryniaŭ. Nastupnym etapam było pasłańnie śpiecyjalistam teatra. Toje, što na hetym forumie pradstaŭleny 13 biełaruskich śpiektaklaŭ, aznačaje, što i heta pasłańnie było pačuta».
Babaryka pažadaŭ pradstaŭnikam biełaruskaha teatralnaha mastactva, kab nastupny «TEART» staŭ «pasłańniem užo ŭsiamu śvietu».
Śpiektaklem adkryćcia mižnarodnaj prahramy forumu stała šviejcarskaja pastanoŭka «Donka — pasłańnie Čechavu» Daniele Fincy Paski, jaki viadomy jak režysior cyrymonii zakryćcia Alimpijskich hulniaŭ u Sočy i Turynie, pastanoŭščyk «Cyrka dziu Salej» i «Cyrka Ełuaz». Teatralnaje dziejstva na scenie minskaha TIUHa ŭvasobili akciory teatra Compagnia Finzi Pasca, stvoranaha ŭ 2011 hodzie. Artysty raźvivajuć kirunak «piaščotnaha teatra», dla jakoha charakterny asablivy stan lohkaści.
Prahramu Belarus Open na scenie Biełaruskaha dziaržaŭnaha teatra lalek adkryje čornaja kamiedyja «Intervju ŭ ź viadźmarkami» Jaŭhiena Karniaha, a taksama teatr tanca Karakuli z pastanoŭkaj Vasen-Extasen. Usiaho sioleta na forumie buduć pakazany 13 biełaruskich pastanovak — rekordnaja kolkaść za ŭsie piać hadoŭ isnavańnia fiestyvalu.
Da 23 kastryčnika amatary teatralnaha mastactva ŭbačać 25 śpiektaklaŭ kalektyvaŭ z 11 krain — Biełarusi, Bielhii, Vienhryi, Hiermanii, Hruzii, Italii, Łatvii, Rasii, Ukrainy, Šviejcaryi i Japonii.
Forum arhanizavany Centram vizualnych i vykanaŭčych mastactvaŭ «Art Karparejšn» i AAT «Biełhazprambank» pry padtrymcy Ministerstva kultury Biełarusi.
