Alaksandr Łukašenka z tych palitykaŭ, staŭleńnie da jakich palarnaje.
Prychilniki demakratyčnaj sistemy kiravańnia buduć pa aznačeńni kateharyčna suprać jaho, a prychilniki aŭtakratyi — za.
Prychilniki jeŭrapiejskaha šlachu raźvićcia suprać jaho prosta tamu, što jon vybraŭ jeŭrazijski viektar.
Dla praciŭnikaŭ dyktatury anafiema dumać pra jaje plusy.
Dla viernapaddanych strašna navat padumać, što niešta nie tak.
Tym nie mienš, ja pasprabavaŭ sabrać top-5 plusoŭ i minusaŭ palityki Alaksandra Łukašenki za pieryjad 2010—2015 hadoŭ.
+ Pazicyja pa Ukrainie
Biełaruś trymajecca niejtralitetu i nie dała siabie ŭciahnuć u vajnu.
+ Baraćba z karupcyjaj i złačynnaściu
U krainie niama bandytyzmu, a karupcyja ŭ nas – na uzroŭni susiedziaŭ ź Jeŭrasajuza, a nie byłych postsavieckich krain.
+ Inviestycyi ŭ sielskuju haspadarku
Ziamla — najbolšy naš resurs — usia zasiavajecca, sielskaja haspadarka nikoli raniej nie była takoj praduktyŭnaj.
+ Inviestycyi ŭ miedycynu
Miedycyna ŭ cełym zastajecca dastupnaja ŭsim ludziam biez vyklučeńnia, a miedycynskija technałohii nie adstajuć ad krain-susiedak. Heta daje rost praciahłaści žyćcia.
+ — Dobryja adnosiny z Rasijaj. Až da samahubstva
Łabavaja kanfrantacyja z Rasijaj zdolnaja pieratvaryć našu krainu ŭ ruiny. Nielha dapuskać, kab Rasija nas zachapiła ci rusifikavała, ale ŭ toj ža čas i izalacyja ad Rasii adkinuła b Biełaruś nazad u raźvićci. Ale imknieńnie atrymlivać rasijskija subsidyi lubym koštam pryviało da taho, što Biełaruś stała vasałam Rasii, častkaj «Ruskaha śvietu», i adstaje ŭ raźvićci.
— Samaŭładździe i abmiežavańnie hramadzianskich pravoŭ, masavyja parušeńni zakonnaści
Vybrany ład kiravańnia pa vyznačeńni pryvodzić da ihnaravańnia kanstytucyjnych pravoŭ i svabod. Heta rykašetam bje pa zvyčkach ludziej i biznes-praktykach. Pieršapryčyny słabaści biełaruskaj ekanomiki – tut.
— Kiepskija adnosiny ź Jeŭropaj i nulavaja jeŭraintehracyja
Jeŭrasajuz uratavaŭ navat samu-vinavatuju Hrecyju, ukłaŭ u jaje 300 miljardaŭ jeŭra, a Biełaruś jak była, tak i zastajecca biednaj pieryfieryjaj kantynienta, nie vykarystoŭvajučy mahčymaściej, jakija daje jeŭraintehracyja.
— Biełaruskaja mova
Biełaruś – adzinaja kraina Jeŭropy, dzie kolkaść ludziej, što havorać na nacyjanalnaj movie, źnižajecca. Nacyjanalnaja śviadomaść zastajecca takoj zadušanaj, što pierśpiektyva likvidacyi dziaržaŭnaści i dałučeńnia susiedniaj krainaj pa-raniejšamu realnyja.
— Tanny ałkahol, i ŭ vyniku masavaje pjanstva
Pjuć masava, cełyja płasty nasielnictva ad taho dehradujuć, a pa kolkaści samahubstvaŭ, bytavych zabojstvaŭ kraina — siarod najhoršych. Samyja talenavityja i pradprymalnyja biahuć z rehijonaŭ i krain, dzie panuje takaja atmaśfiera.
— Dehradacyja adukacyi praz małyja zarobki nastaŭnikaŭ
Nizki ŭzrovień siaredniaj adukacyi i devalvacyja dypłomaŭ pra vyšejšuju aśvietu robić biełaruskuju pracoŭnuju siłu niekankurentnaj u suśvietnym maštabie, što maje vynikam ekanamičnuju stahnacyju.
Što pieravažvaje, plusy ci minusy? Abmiarkoŭvajcie!
