Pasoł Rasii ŭ Varšavie vyklikaŭ abureńnie palakaŭ, zajaviŭšy, što Polšča častkova vinavataja ŭ pačatku Druhoj suśvietnaj vajny.
U intervju, jakoje tranślavałasia telekampanijaj TVN24 u piatnicu ŭviečary, pasoł Siarhiej Andrejeŭ zajaviŭ, što palityka polskich uładaŭ pryviała da katastrofy ŭ vieraśni 1939 hoda, bo na praciahu 1930-ch hadoŭ Polšča nieadnarazova błakavała stvareńnie antyhitleraŭskaj kaalicyi.
Tamu, pavodle jaho słoŭ, Polšča častkova vinavataja ŭ suviazi z trahiedyjaj.
Jak paviedamlajecca, rasijski pasoł budzie vyklikany ŭ paniadziełak u MZS Polščy dla tłumačeńniaŭ.
Siarhiej Andrejeŭ zajaviŭ taksama, što ŭ 1939 hodzie Saviecki Sajuz dziejničaŭ u metach samaabarony, tamu ŭvarvańnie SSSR u Polšču nie moža ličycca ahresijaj.
U intervju polskamu telebačańniu Andrejeŭ taksama paskardziŭsia na toje, što polska-rasijskija adnosiny ciapier horšyja, čym kali-niebudź za papiarednija 70 hadoŭ, bo Varšava vybrała zamarozku palityčnych i kulturnych kantaktaŭ krain.
Polski MZS u subotu vykazaŭ svaje «ździŭleńnie i tryvohu» słovami rasijskaha dypłamata, zajaviŭšy, što pasoł «padryvaje histaryčnuju praŭdu» i, «vidać, sprabuje apraŭdać złačynstvy stalinizmu».
«Kropka hledžańnia, pradstaŭlenaja samym vysokim pradstaŭnikom rasijskaj dziaržavy ŭ Polščy, padryvaje histaryčnuju praŭdu i adlustroŭvaje samuju kryvadušnuju interpretacyju padziej, viadomych jašče z časoŭ stalinizmu i kamunizmu», — havorycca ŭ zajavie ministerstva zamiežnych spraŭ Polščy.
«My rasceńvajem heta jak niepavahu da pamiaci achviaraŭ złačynstvaŭ NKVD, učynienych pa zahadzie savieckich uładaŭ», - zajaviŭ polski MZS.
Paśla ŭvarvańnia savieckaj armii ŭ Polšču bolš za 200 tysiač polskich vajskoŭcaŭ byli adpraŭlenyja ŭ HUŁAH, bolš za 20 tysiač byli rasstralanyja ŭviesnu 1940 hoda supracoŭnikami NKVD u Katyni.
Premjer-ministr Polščy Eva Kopač taksama vykazała svajo niezadavalnieńnie zajavami rasijskaha dypłamata.
«Rola akredytavanaha ŭ krainie pasła pavinna być u tym, kab budavać harmaničnyja i družalubnyja adnosiny pamiž krainami», — nahadała kiraŭnik polskaha kabinieta ministraŭ.
Adkazvajučy na pytańnie pra vykazvańni rasijskaha pasła, Eva Kopač zaŭvažyła: «Navat dzieci viedajuć, što ni Rybientrop, ni Mołataŭ nie byli palakami».
