Eks-kandydata ŭ prezidenty Alesia Michaleviča, jaki zastajecca ŭ statusie abvinavačvanaha pa spravie ab masavych biesparadkach 19 śniežnia 2010 hoda, 11 vieraśnia dapytvali ŭ Śledčym kamitecie Biełarusi.
«Ja siońnia byŭ u Śledčym kamitecie, dopyt praciahvaŭsia paŭtary hadziny. Usio prajšło ŭ poŭnaj adpaviednaści z zakanadaŭstvam, navat zapisvali maje pakazańni pa-biełarusku», — skazaŭ Michalevič.
Pavodle jaho słoŭ, śledčy cikaviŭsia pryčynami, z-za jakich Michalevič u 2011 hodzie źjechaŭ u Čechiju, a taksama ŭdakładniaŭ, ci pahadžajecca palityk sa svaimi papiarednimi pakazańniami.
Michalevič pry hetym zamaŭlaŭ pra aznajamleńnie sa svaimi raniejšymi pakazańniami, pakolki prajšło prykładna piać hadoŭ z taho času, jak jon ich davaŭ. U SK Michaleviču skazali, što «patelefanujuć na nastupnym tydni i skažuć, kali možna budzie ź imi aznajomicca».
Pry hetym palityk paćvierdziŭ infarmacyju, što na pieršy dopyt paśla viartańnia ŭ Biełaruś jaho vyklikali vusna, biez pozvy. «Majoj žoncy patelefanavali i paprasili mianie pieratelefanavać. Ja nie staŭ iści na pryncyp, tamu što liču, što možna damovicca i pa telefonie», — skazaŭ Michalevič.
Eks-kandydat na pasadu prezidenta ŭ 2010 hodzie Aleś Michalevič viarnuŭsia ŭ Biełaruś 8 vieraśnia praz čatyry z pałovaj hady emihracyi ŭ Čechii, dzie jon atrymaŭ palityčnaje prystanišča. Palityk byŭ zatrymany biełaruskimi pahraničnikami pry ŭjeździe ź Litvy padčas pašpartnaha kantrolu jak asoba, što znachodzicca ŭ nacyjanalnym vyšuku. Michalevič byŭ pieradadzieny milicyi, ale praź niekalki hadzin adpuščany na volu pad padpisku ab niavyjeździe, choć nie padpisvaŭ nijakich dakumientaŭ.
