Adzin z pretendentaŭ na pasadu prezidenta Biełarusi ekanamist Viktar Ciareščanka abviaściŭ pra svoj vychad z vybarčaj kampanii.
«Maja vybarčaja kampanija, u jakoj ja płanavaŭ stać kandydatam u prezidenty, niepažadanaja ŭłady, — zajaviŭ Ciareščanka BiełaPAN. — Było zroblena ŭsio, kab znajści niesapraŭdnyja podpisy. Tak, tut jość i maja vina, bo mianie napeŭna padstavili, i ja apynuŭsia zakładnikam ludziej, jakija zrabili hetuju brudnuju pracu. Ale nielha nie bačyć i toje, što ŭłady ŭsialak spryjali majmu źniaćciu z vybaraŭ, pryciahvajučy da mianie asablivuju ŭvahu. Usio heta ja razhladaju jak niežadańnie ŭładaŭ, kab ja danios svaju prahramu da vybarščykaŭ».
Pry hetym Ciareščanka zaklikaje źniacca z prezidenckich vybaraŭ i inšych alternatyŭnych pretendentaŭ na pasadu prezidenta.
Raniej paviedamlałasia, što Viktar Ciareščanka padaŭ u CVK dakumienty na rehistracyju kandydatam u prezidenty niahledziačy na toje, što bolšaść podpisaŭ, sabranych u padtrymku jaho vyłučeńnia, terytaryjalnymi vybarčymi kamisijami byli pryznanyja niesapraŭdnymi. Jaho inicyjatyŭnaja hrupa zdała prykładna 130 tysiač podpisaŭ, ale sapraŭdnymi byli pryznanyja mienš za siem tysiač.
Takim čynam na vybarčaj dystancyi zastajucca čatyry čałavieki: Siarhiej Hajdukievič, Taćciana Karatkievič, Alaksandr Łukašenka i Mikałaj Ułachovič.
Rehistracyja kandydataŭ projdzie zaŭtra, 10 vieraśnia. Prezidenckija vybary — 11 kastryčnika.
