Virtualny ablot vałunoŭ, kali b jany byli adkapanyja. Kampjutarnaja simulacyja LBI ArchPro
Hrupa archieołahaŭ z dapamohaj radyjołakacyjnaha abstalavańnia, lidáraŭ i mahnitomietraŭ znajšli ŭ troch kiłamietrach ad Stoŭnchiendža hrupu vałunoŭ, schavanych u mietry pad ziamloj.
BBC piša, što heta moža być najvialikšym archieałahičnym pomnikam časoŭ niealitu ŭ Brytanii. The Guardian aceńvaje maštaby znachodki jak «archieałohiju na steroidach». Daily Mail nazyvaje znachodku «Stoŭnchiendž-2».
Schavanyja pad ziamloj stajačyja vałuny dasiahajuć 4,5 mietra ŭ vyšyniu, linija moža naličvać 90 i bolš takich vałunoŭ. Pabudovie kala 4500 hod — jaje mahli zbudavać tyja ž ludzi, što budavali susiedni Stoŭnchiendž.
U adroźnieńnie ad Stoŭnchiendža, dzie vałuny vystaŭlenyja ŭ koły, kamiani «Stoŭnchiendža-2» utvarajuć amal pramuju liniju. Vałuny raźmieščanyja pa paŭdniova-uschodnim krai taho, što paźniej stała viadoma jak Darynhtan-Uołs, bujnoha pasielišča časoŭ niealitu, dzie mierkavana žyli budaŭniki Stoŭnchiendža.
Mahčymy vyhlad vałunoŭ, kali b jany byli adkapanyja. Tut i nižej vyjavy: Ludwig Boltzmann Institute/Geert Verhoeven Institute
«Novaja znachodka demanstruje całkam niečakany etap manumientalnaj architektury ŭ adnym z samych vialikich cyrymanijalnych miescaŭ u dahistaryčnaj Jeŭropie», — kaža Vins Hafni z Univiersiteta Bredfarda, adzin z kiraŭnikoŭ prajektu Stonehenge Hidden Landscapes.
Chacia ŭ Darynhtan-Uołs raniej znachodzili mienšyja pa pamierach rytualnyja struktury z kamiania i dreva, takoj vialikaj znachodki nie čakaŭ nichto. Mahčyma, usio, što na siońnia viadoma pra Stoŭnchendž, pryjdziecca pierapisać.
Darynhtan-Uołs na paŭnočnym zachadzie ad Stoŭnchiendža
Pavodle papiarednich daśledavańniaŭ, charaktar kamianioŭ padobny da tych, ź jakich zbudavany Stoŭnchendž. Ale pryznačeńnie pabudovy zastajecca zahadkaj: chutčej za ŭsio, kamiani mieli rytualnaje značeńnie, dy jakoje mienavita, nieviadoma. Jak nieviadoma i toje, jak i kali kamiani apynulisia pad ziamloj. Mahčyma, jany ŭmacoŭvali mahutny ziemlany vał vakoł pasielišča.
Abstalavańnie, z dapamohaj jakoha byli znojdzienyja vałuny, nie daje adkazaŭ na mnohija pytańni — navat nie moža skazać, jakoha pachodžańnia i składu hetyja vałuny. Dalejšyja daśledavańni chutčej za ŭsio buduć patrabavać raskopak, ale data ich pačatku jašče nie pryznačanaja.
Praces pošuku padziemnych struktur pobač sa Stoŭnchiendžam