Staŭleńnie da Biełarusi z boku mižnarodnaj supolnaści napiaredadni vybaraŭ 2015 hoda, u paraŭnańni z papiarednimi vybarčymi kampanijami, źmianiłasia, «ale nam samim, viadoma, treba ničoha nie sapsavać», zajaviła staršynia Centrvybarkama Lidzija Jarmošyna 25 žniŭnia ŭ efiry anłajn-viaščańnia redakcyi haziety «Sovietskaja Biełoruśsija».
«Staŭleńnie źmianiłasia, prynamsi, usio simpatyčna i dobrazyčliva poŭnaściu vyhladaje, — skazała Jarmošyna. — Davodzicca ŭvieś čas kivać na susiedku, usio heta źviazana i z Rasijaj taksama. Ź Biełaruśsiu, jość takoje ŭražańnie, stali sprabavać siabravać. Raniej jaje adchilali jak maleńkuju małaŭpłyvovuju krainu, jakaja znachodzicca ŭ zonie rasijskaha ŭpłyvu, I, u pryncypie: što tam havaryć z hetaj apošniaj dyktaturaj?»
Staršynia CVK nahadała pra svoj vizit u Vienu ŭ 2012 hodzie na pasiadžeńnie ŭ miežach Parłamienckaj asamblei ABSIE napiaredadni parłamienckich vybaraŭ u Biełarusi. «Pierad maim vystupleńniem pasły dziesiaci krain Jeŭrapiejskaha sajuza na čale z pasłom ZŠA pakinuli zału. Heta byŭ demarš. Praŭda, jany pakinuli nie tolki tamu, što heta ja — Jarmošyna, a tamu, što na hetaje mierapryjemstva kahości kraina nie vypuściła z pradstaŭnikoŭ biełaruskaj apazicyi. I ŭ honar majho naviedvańnia navat byŭ arhanizavany pikiet pradstaŭnikami biełaruskaj apazicyi za miažoj», — skazała Jarmošyna.
Padčas jaje apošniaha vizitu ŭ Vienu na anałahičnaje mierapryjemstva ŭ miežach ABSIE krychu bolš jak miesiac tamu stanovišča, pavodle słoŭ Jarmošynaj, było zusim inšaje. «Pradstaŭnikoŭ apazicyi, jakija tam byli, prosta papiaredžvali pra nieabchodnaść tolki kanstruktyŭnaj krytyki. A try hady tamu nikomu i ŭ hałavu hetaha nie prychodziła. Ja adrazu ž mahu skazać, što da Biełarusi cikavaść vialikaja, i jana pazityŭnaja. Sustreč šmat było ŭ kułuarach, u toj čas jak try hady tamu ad mianie biehali», — adznačyła kiraŭnik CVK.
