Arhkamitet pa stvareńni partyi «Biełaruskaja chryścijanskaja demakratyja» (BCHD) i hramadskaje abjadnańnie «Tavarystva biełaruskaj movy imia Franciška Skaryny» (TBM) pačali sumiesnuju kampaniju pa pašyreńni navučańnia dziaciej u sadkach na biełaruskaj movie. Pra heta było zajaŭlena 17 krasavika na pres-kanfierencyi ŭ Minsku.
Jak adznačyła pradstaŭnik BCHD Maryna Chomič, siońnia navučańnie dziaciej na biełaruskaj movie sustrakajecca dastatkova redka. «Meta našaj kampanii — pavialičyć kolkaść dziaciej, jakija buduć vučycca ŭ sadkach i škołach na biełaruskaj movie. My nie chočam, kab biełaruskaja mova ŭsprymałasia ŭ Biełarusi jak zamiežnaja», — skazała jana.
Chomič paviedamiła, što inicyjatary kampanii da kanca maja buduć źbirać podpisy tych, chto choča, kab ich dziaciej vučyli ŭ dziciačych sadkach na biełaruskaj movie. «My prapanoŭvajem paviedamlać nam ab svaim žadańni nakiroŭvać dziaciej u biełaruskamoŭnyja hrupy pa elektronnaj pošcie [email protected] abo pa telefonie (025) 538-40-59. Sa svajho boku my abiacajem jurydyčnuju padtrymku. U nas užo padrychtavanyja zajavy na imia načalnikaŭ upraŭleńniaŭ adukacyi, sportu i turyzmu minskich administracyj z prośbaj pryniać dzicia ŭ hrupu ź biełaruskaj movaj navučańnia ŭ dziciačy sadok, a taksama kalektyŭny zvarot z patrabavańniem stvareńnia ŭ kožnym dziciačym sadku i škole biełaruskamoŭnych hrup i kłasaŭ», — skazała jana.
«Časta baćki razmaŭlajuć doma ź dziciem pa-biełarusku. Adnak jany addajuć dziaciej u sadki i natykajucca tam na ścianu nierazumieńnia. Jany vymušanyja addavać dziaciej u ruskamoŭnyja hrupy, bo inšych prosta niama. Tamu nieabchodna, kab hramadstva ŭziało pad svoj kantrol realizacyju kanstytucyjnaha prava — vybrać biełaruskuju movu navučańnia», — adznačyła pieršy namieśnik staršyni TBM Alena Anisim.
