Mała chto z čynoŭnikaŭ, navat maładych, zavodzić akaŭnty ŭ sacyjalnych sietkach — takaja adkrytaść nieŭłaścivaja biełaruskaj palityčnaj kultury. A voś dzieci namienkłatury nie admaŭlajuć sabie ŭ takim zadavalnieńni. Jany z radaściu dzielacca ź inšymi internet-karystalnikami asabistymi zdymkami i raskazvajuć pra svaje chobi.
«Naša Niva» sabrała infarmacyju pra dziaciej i ŭnukaŭ najvyšejšych uradoŭcaŭ. Dzie jany vučylisia i dzie pracujuć ciapier?
* * *
Hałoŭnaja siamja krainy składajecca z 60-hadovaha Alaksandra Łukašenki i troch jahonych synoŭ. Starejšamu, Viktaru, sioleta spoŭnicca 40 hadoŭ. Apošniaje dziesiacihodździe jon pracuje pamočnikam baćki pa nacyjanalnaj biaśpiecy. U siamji Viktara ŭžo čaćviora dziaciej. Dačka Viktoryja prasłaviłasia paśla zdymkaŭ kamiedyi «Na śpinie ŭ čornaha kata». Ciapier joj 17 hadoŭ. 10-hadovy Alaksandr sioleta vyjhraŭ Kaladny turnir pa spartyŭna-bajavych adzinaborstvach na pryzy mitrapalita Fiłareta. Valeryja i Jarasłaŭ u škołu jašče nie chodziać.
Dźmitryj Łukašenka ŭznačalvaje Prezidencki spartyŭny kłub. Jon taksama šmatdzietny baćka. Starejšyja dzieci, Darja i Nastaśsia, pazaletaś pieramahli ŭ konkursie biełaruskamoŭnych kazak, a dva miesiacy tamu jašče i ŭ konkursie instrumientalnaj muzyki «Maładyja talenty Biełarusi». Małodšaj dačce, Alaksandry, pakul mienš za hod.
Małodšy syn kiraŭnika dziaržavy Mikałaj pakul što školnik.
* * *
54-hadovy Andrej Kabiakoŭ ciapier premjer-ministr, druhaja asoba krainy.
Žyćcio čynoŭnika ščylna źviazanaje z Rasijaj: adtul jahonyja baćki, tam naradzilisia jahonaja žonka i jon sam. U Maskvie Kabiakoŭ vučyŭsia ŭ avijacyjnym instytucie, a ŭ 2011—2012 pracavaŭ biełaruskim pasłom. U ankiecie 29-hadovaj dački Viery ŭ sacyjalnaj sietcy «Ukantakcie» paznačana, što jana skončyła 24-ju minskuju linhvistyčnuju himnaziju, vučyłasia na hieałahičnym fakultecie MHU. Zavočna Kabiakova atrymała dypłom pryborabudaŭničaha fakulteta BNTU i ŭładkavałasia… u Nacbank. Tam jana pracavała viadučym ekanamistam, a ŭ 2012-m pierajšła hałoŭnym śpiecyjalistam-ekśpiertam u «BPS-Śbierbank». Kabiakoŭ kazaŭ u intervju, što jahonaja dačka ŭžo pabrałasia šlubam.
Zołata na kubku SND pa taekvando (niealimpijskaja viersija) u śniežni 2014 zavajavaŭ Hieorhij Kabiakoŭ. Heta małodšy syn premjer-ministra. Sioleta chłopcu spoŭnicca 17 hadoŭ.
Novy kiraŭnik Administracyi prezidenta Alaksandr Kosiniec pa prafiesii chirurh. Jamu ciapier 55 hadoŭ. Čynoŭnik abaraniŭ doktarskuju dysiertacyju pa lačeńni hnojnych uskładnieńniaŭ na orhanach brušnoj połaści, kali jamu było 34 hady.
Jahony syn Uładzimir atrymaŭ takuju ž navukovuju stupień jašče maładziejšym, u 31 hod.
Śpiecyjalizacyja Kosinca-małodšaha — płastyčnaja chirurhija. Uładzimir pastupiŭ na lačebny fakultet Viciebskaha miedycynskaha ŭniviersiteta, kali jahony baćka byŭ rektaram. Ź ciaham času Alaksandra Kosinca pieraviali ŭ Minsk na pasadu vice- premjera, a syn zastaŭsia davučvacca ŭ Viciebsku. Uładzimir skončyŭ aśpiranturu, abaraniŭ kandydackuju dysiertacyju, a paśla źjechaŭ u Rasiju. Tam jon i staŭ doktaram miedycynskich navuk. Ciapier jon uznačalvaje estetyčnuju kliniku Jeŭrapiejskaha miedycynskaha centra ŭ Maskvie. Apieracyja pa pavieličeńni hrudziej va Uładzimira Kosinca kaštuje kala $3500, płastyka tvaru — $2500.
* * *
Adziny syn pieršaha vice-premjera Vasila Maciušeŭskaha i jahonaj žonki, doktara ekanamičnych navuk Aleny Davydzienki, rychtujecca stać finansistam. Sioleta Jan skančaje navučańnie ŭ BDU.
* * *
Da pryznačeńnia na pasadu vice-premjera, adkaznaha za sacyjalnyja pytańni, 54-hadovaja Natalla Kačanava była staršynioj Navapołackaha harvykankama.
Na małoj radzimie zastałasia jaje małodšaja dačka Alena. Jana skončyła połackuju himnaziju, a ciapier vučycca na historyka-fiłałahičnym fakultecie Połackaha dziaržaŭnaha ŭniviersiteta. Za pośpiechi ŭ navučańni dziaŭčynie stali naličvać piersanalnuju stypiendyju Rady ŭniviersiteta.
Jaje starejšaja siastra Volha vučyłasia ŭ Minsku na doktara. U mieduniviersitecie jana paznajomiłasia sa svaim budučym mužam. Aboje — piedyjatry. Ciapier žyvuć u Navapołacku i hadujuć dvuch synoŭ.
* * *
60-hadovy vice-premjer Michaił Rusy hałoŭny ŭ krainie pa sielskaj haspadarcy. U jahonaj siamji dźvie dački. Starejšaja, Taćciana, skončyła fakultet technałohii arhaničnych rečyvaŭ BDTU, a małodšaja Julija vučyłasia na finansista ŭ BDEU.
Taćciana Rusaja.
Julija Rusaja.
* * *
Va ŭradzie vice-premjer Anatol Kalinin adkazvaje za transpart i budaŭnictva. Jahonaja dačka Alena — zahadčyca adździaleńnia miedyka-hienietyčnaha kansultavańnia RNPC «Maci i dzicia». Jaje małodšy brat Vital, pa słovach svajakoŭ, zajmajecca biznesam.
* * *
Starejšy syn ministra zamiežnych spraŭ Uładzimira Makieja pajšoŭ pa baćkavym dypłamatyčnym šlachu. Raniej Vital pracavaŭ u Vienie, a ciapier — u Ńju-Jorku. Jon daradca pa ekanamičnych i ekałahičnych pytańniach u pradstaŭnictvie Biełarusi ŭ AAN. Cikava, što Vital abraŭ sabie dziŭnuju transkrypcyju proźvišča, adroznuju ad baćki — Mackay. Razam z žonkaj Marharytaj jon haduje dačku Maryju. Niaviestka ministra raniej była ekanamistam u «Biełavija», abaraniła kandydackuju dysiertacyju z prapanovami pa ŭdaskanaleńni pracy avijakampanij.
Vital Makiej.
Niaviestka ministra Marharyta Makiej.
Druhim šlubam Uładzimir Makiej pabraŭsia z aktrysaj i televiadučaj Vieraj Palakovaj. Ich syn Arciom sioleta maje pajści ŭ pieršy kłas. Ciešča ministra — prarektarka ŭ Instytucie fizkultury.
* * *
47-hadovy ministr abarony Andrej Raŭkoŭ pry pasadzie ŭsiaho niekalki miesiacaŭ. 25-hadovaja dačka ministra pastupiła ŭ BDEU. Jašče padčas vučoby jana vyjšła zamuž. Ciapier Julija haduje małuju dačku. Jaje chobi — vyrab upryhožvańniaŭ ź lamcu. Paśla taho, jak baćka staŭ ministram, Julija źmianiła proźvišča ŭ sacyjalnych sietkach.
* * *
Adziny syn staršyni Centralnaj vybarčaj kamisii Lidzii Jarmošynaj pa-raniejšamu pracuje ŭ Minskaj abłasnoj kalehii advakataŭ. Alaksiej ciapier žyvie asobna ad maci. «Častku ježy ja dastaŭlaju ŭ kantejnierach svajmu synu… Pryvožu vialikuju asnoŭnuju stravu, jakuju možna razahravać na praciahu dvuch-troch dzion», — nie zabyvajecca jana pra Alaksieja.
* * *
U staršyni praŭleńnia Nacbanka Paŭła Kałaŭra i hałoŭnaj buchhałtarki banka «Maskva—Minsk» Łarysy Kałaŭr dvoje synoŭ, abodva pracujuć u bankaŭskaj śfiery.
Uładzimiru 29 hadoŭ, razam z žonkaj Irynaj jon haduje dźviuch dačok.
Alaksieju, vypuskniku BDEU, na hod mienš. Jahonaje imia fihuravała ŭ jakaści hałoŭnaha mieniedžara «BPS-Śbierbanka». Niejki čas bankir papracavaŭ u Rasii.
* * *
U siamji kiraŭnika dziaržaŭnaha Banka raźvićcia Siarhieja Rumasa i stamatołaha pryvatnaha miedcentra «Karona» Žanny Rumas čaćviora synoŭ. Pavodle infarmacyi «Narodnaj voli», starejšy, Valeryj, skončyŭ ekanamičny fakultet BDU, a paśla razam z žonkaj Nastaśsiaj vučyŭsia ŭ łondanskaj Cass Business School. Ciapier maładaja siamja viarnułasia ŭ Biełaruś.
Siarhiej i Maksim Rumasy — školniki, a Pilip jašče zusim mały.
Źleva syny Siarhiej i Maksim.
* * *
Były ministr adukacyi i kiraŭnik Administracyi prezidenta Alaksandr Radźkoŭ ciapier pamočnik Alaksandra Łukašenki. 63-hadovy matematyk-piedahoh uznačalvaje kancylaryju kiraŭnika krainy. Zastajecca jon i lidaram «Biełaj Rusi». U Radźkova dźvie dački. Pra małodšuju jon uzhadvaŭ, što taja skončyła injaz i pracuje na radyjostancyi «Biełaruś».
Starejšaja, Natalla Ihnacienka, žyvie ŭ Maskvie i pracuje nastaŭnicaj u muzyčnaj škole. A ŭ Biełarusi vydajucca jaje tvory, letaś vyjšła kniha «Jak dva braty spartsmienami stali». Dzieci piśmieńnicy nasamreč źviazanyja sa sportam.
Pavieł Ihnacienka, choć i žyvie ŭ Maskvie, vystupaje za Biełaruś. Jon najlepšy fihuryst krainy, praŭda, na sioletnim čempijanacie Jeŭropy zaniaŭ tolki 21-je miesca siarod 24-ch udzielnikaŭ. Paralelna jon zavočna vučycca ŭ Rasijskim dziaržaŭnym univiersitecie fizkultury i sportu.
Druhi ŭnuk Alaksandra Radźkova, Kirył, zajmajecca chakiejem. Chłopiec maryć vystupać za zbornuju Biełarusi i zrabiŭ sa svaim fota voś taki kałaž.
