Prajekt palotu na Mars u adzin kaniec Mars One abviaściŭ śpis sa 100 kandydataŭ, što prajšli čarhovy raŭnd adboru. Padčas druhoha raŭndu pravodzilisia anłajn-intervju z hałoŭnym uračom prajektu doktaram Norbiertam Kraftam. U papiarednim adbory byli adsiejanyja kandydaty, što vidavočna nie padychodzili pa fizičnych paramietrach ci stavilisia da prajektu niesurjozna.
Ź Biełarusi na ŭdzieł u prahramie paśla pieršaha raŭndu adboru pretendavali Anton Jafremaŭ, Viktoryja Łazarava, Mikita Chatkievič, Michaił Rumiancaŭ i Nastaśsia Pańšyna. Nichto ź ich nie prajšoŭ u «paŭfinalnuju» sotniu.
Siarod udzielnikaŭ prajektu, što prajšli ŭ treci raŭnd adboru, 50 mužčyn i 50 žančyn z usich kancoŭ śvietu, u tym liku 5 rasijan, 3 palaki i 1 ukrainiec.
Ź ich u trecim raŭndzie sfarmujuć kamandy, jakija buduć praviaracca ŭ realistyčnych simulacyjach. Pieršapačatkova treci raŭnd byŭ zapłanavany na 2014 hod, ale jaho adkłali pa nienazvanych pryčynach. Raniej pradstaŭniki prajektu zajaŭlali ab mahčymaści teletranślacyj treciaha raŭndu adboru.
Kandydaty, što nie prajšli biahučy adbor, mohuć pasprabavać svaje siły ŭ nastupnych adborach, bližejšy ź jakich zapłanavany na 2015 hod.
* * *
Mars One — pryvatny prajekt, što praduhledžvaje zasnavańnie kałonii na Marsie, jakaja da 2035 hoda musić dasiahnuć nasielnictva ŭ 44 čałavieki. Finansavańnie płanujecca atrymać ad sponsaraŭ i pakazu prajektu pa telebačańni ŭ formie realici-šoŭ.
U 2018 hodzie prajekt Mars One płanuje adasłać na Mars bieśpiłotny daśledčy aparat, u 2020-m — marsachod, u 2022-m — hruzavy karabiel. Start pieršaj kamandy ludziej pryznačany na krasavik 2024 hoda, nastupnaja kamanda mierkavana palacić u 2026 hodzie. Sam palot zojmie kala 210 dzion. Viartańnie pieršych marsijan na Ziamlu nie praduhledžanaje.
