Jak paviedamiŭ 5 lutaha na bryfinhu ŭ Maskvie pamočnik prezidenta RF Juryj Ušakoŭ, 7 i 8 lutaha Pucin praviadzie ŭ Sočy niefarmalnyja sustrečy z kiraŭnikami Kyrhyzstana i Biełarusi.
Sustreča z Ałmaźbiekam Atambajevym projdzie ŭ subotu, z Alaksandram Łukašenkam — u niadzielu, udakładniŭ Ušakoŭ. Jon padkreśliŭ, što majučyja adbycca kantakty — nie rabočyja, jany nosiać charaktar niefarmalnych razmoŭ, ab jakich kiraŭniki damovilisia zahadzia.
Nahadajem, ab praviadzieńni sustrečy ŭ bližejšy čas Łukašenka i Pucin damovilisia 23 studzienia ŭ čas telefonnaj razmovy. Nieaficyjnaja infarmacyja ab tym, što biełaruski kiraŭnik adpraviŭsia adpačyvać u Sočy, źjaviłasia 31 studzienia. Uviečary 2 lutaha jaje paćvierdziła dziaržaŭnaje ahienctva BIEŁTA, jakoje paviedamiła, što Łukašenka znachodzicca ŭ karotkaterminovym adpačynku ŭ Sočy, dzie maje namier prainśpiektavać realizacyju płanaŭ pa raźvićci biełaruskaj spartyŭna-turystyčnaj bazy i sustrecca z Pucinym.
Na dumku ekśpiertaŭ, adnoj z hałoŭnych tem na sustrečy Łukašenki z Pucinym stanie pytańnie ab pradastaŭleńni Biełarusi finansavaj dapamohi. Na pres-kanfierencyi 29 studzienia Łukašenka ŭskosna zakranuŭ hetuju temu.
«Nam nie chaciełasia b bolš brać kredytaŭ. Ale ja maju ćviordyja damoŭlenaści z prezidentam i premjer-ministram: kali nam budzie ciažka, vielmi budzie ciažka — Rasija plačo padstavić. Ja pracytavaŭ Pucina», — zajaviŭ jon. «Nie tamu, što my nachlebniki, a tamu, što, davajcie ščyra kazać, naša ekanomika — častka rasijskaj ekanomiki, — padkreśliŭ Łukašenka. — My spažyvajem u ich vielizarnuju kolkaść resursaŭ, kuplajem na 30 miljardaŭ dalaraŭ pa imparcie ŭ tavaraabarocie… My kuplajem u ich kamplektujučyja, dajem im pracu, stvarajem hatovy pradukt i pałovu pradajem u Rasijskaj Fiederacyi. Heta vyhadna dla Rasii? Vyhadna. Tamu nikudy nie padzieniešsia — treba padtrymać, kali heta budzie treba. Ale mnie nie chaciełasia b zakredytoŭvajecca i dalej».
30 studzienia ministr finansaŭ RF Anton Siłuanaŭ paćvierdziŭ, što ŭ vypadku nieabchodnaści Rasija razhledzić mahčymaść pradastaŭleńnia finansavaj dapamohi Biełarusi. «U vypadku krajniaj nieabchodnaści my hatovyja razhladzieć ich prośbu ab dapamozie», — skazaŭ jon u intervju telekampanii CNBC.
«Ciapier my vyvučajem situacyju razam z našymi biełaruskimi kalehami. My analizujem usie faktary, jakija akazvajuć uździejańnie na ekanamičnuju situacyju ŭ abiedźviuch krainach, u pryvatnaści, sankcyi i padzieńnie koštaŭ na naftu. U ciapierašni čas my viadziom pieramovy», — adznačyŭ Siłuan.
