Siońnia Viarchoŭny sud Biełarusi pakinuŭ u sile papiaredžańnie Ministerstva infarmacyi haziecie «Narodnaja vola». Sud padtrymaŭ pastanovu Mininfarmacyi ab tym, što ŭ svajoj aŭtarskaj kałoncy «Na łancuh!» Śviatłana Kalinkina raspaŭsiudžvała niepraŭdzivuju infarmacyju ab niemahčymaści Biełarusi pakinuć JEAES pavodle ŭłasnaha žadańnia.
Sama Kalinkina ŭ kamientary «Našaj Nivie» patłumačyła, što takoje rašeńnie suda — chutčej za ŭsio padrychtoŭka da vybaraŭ 2015 hoda:
«Ja dumaju, što rašeńnie Mininfarmacyi nie źviazana z patrabavańniem ab pluraliźmie dumak u našaj krainie.
Chutčej za ŭsio, tut sprava ŭ nadychodziačych prezidenckich vybarach. Usie viedamstvy da ich rychtujucca. Ministerstva infarmacyi tradycyjna razumieje, što jano adkaznaje, kab niezaležnyja krynicy infarmacyi byli «na kručku», vynosić papiaredžańni niezaležnym ŚMI. Ja nie vyklučaju, što heta taki kručok, na jaki nas padviesili.
Dziejańnie pieršaha papiaredžańnia jašče nie skončyłasia. Jano było vyniesiena nam za adkryty list Alaksandru Łukašenku ad žonki asudžanaha byłoha hałoŭnaha ŭrača kaściukovickaj balnicy. Nas abvinavacili ŭ cisku na sud. Darečy, paśla publikacyi lista ŭraču źmianili prysud z šaści hadoŭ da troch hadoŭ, i heta aznačaje, što ŭ liście ŭsio ž byli niejkija elemiety praŭdy. Na žal, u našych umovach abskardzić rašeńni Mininfarmacyi niemahčyma. I adkryty list da Łukašenki taksama karajecca zakonam».
Nahadajem, što pavodle zakonaŭ Biełarusi, Ministerstva infamarmacyi moža inicyjavać zakryćcio ŚMI, jaki atrymaŭ dva papiaredžańni ciaham adnaho hoda. Tamu, faktyčna, «Narodnuju volu» mohuć zakryć u luby momant.
