Ihar Łohvinaŭ, fota Siarhieja Hudzilina.
Niezaležny vydaviec vystupiŭ z zaklikam padtrymać kniharniu «łohvinaŬ» materyjalna.
«Niahledziačy na ŭsie našy vysiłki i žadańnie pracavać lehalna, my apynulisia ŭ takoj situacyi, što nam pahražaje štraf amal 970 miljonaŭ rubloŭ, što robić dalejšuju našu pracu niemahčymaj. Ciapier my znachodzimsia ŭ stadyi sudovych raźbiralnictvaŭ. Ale situacyja składajecca tak, što nam daviadziecca vypłačvać hety štraf. I my prymajem na siabie abaviazalnictvy pa jaho vypłacie», — abaznačyŭ svaju pazicyju Ihar Łohvinaŭ.
Jon zaklikaje hramadskaść dapamahčy kniharni. Dla jaje dalejšaha isnavańnia patrebnyja hrošy: na vypłatu štrafu (kali sudovaje rašeńnie nie budzie admieniena), na vypłatu arendy.
I kali hramadskaść choča zachavać hetuju intelektualnuju placoŭku, jana musić achviaravać.
Fiłosaf Valancin Akudovič nazvaŭ «akcyju» suprać kniharni spłanavanaj. Jon adznačyŭ, što padatkovaja nie pryjšła z pravierkaj u kniharniu paśla pieršaj, druhoj ci treciaj admovy ŭ rehistracyi. A čakali amal hod, kab suma «nabiehła» bolšaja — amal na miljard. A heta ŭžo značnyja hrošy. «Kab kniharnia z hetaha štrafu ŭžo nikoli nie mahła vykaraskacca i dalej isnavać».
Piśmieńnik Uładzimir Arłoŭ hatovy stać na peŭny čas za pryłavak kniharni, kab padtrymać jaje. Da hetaha zaklikaje i inšych kaleh.
«U dadzienaj situacyi, kali naša viarchoŭnaja ŭłada zahavorvaje pra viartańnie da nacyjanalnych kaštoŭnaściej, pra toje, što straciŭšy movu i kulturu, my źnikniem jak nacyja, u nas nie budzie histaryčnaj pierśpiektyvy, vyhladaje vielmi dziŭnym taki najezd na kniharniu. Moža heta možna kvalifikavać tak: levaja ruka nie viedaje, što robić pravaja. Ja ŭsio-taki spadziajusia, što Viarchoŭny Sud uličyć hetuju situacyju, i budzie razhladać kniharniu «łohvinaŬ» nie jak šarahovuju jurydyčnuju asobu», — adznačyŭ Arłoŭ.
Staršynia PEN-centra Andrej Chadanovič źviarnuŭ uvahu, što padtrymać kniharniu možna, «układvajučy svaje kroŭnyja hrošyki ŭ našy kroŭnyja knižki» — «nabyvać knihi z asartymientu».
Ciapier Ihar Łohvinaŭ abskardžvaje apošniuju admovu Ministerstva infarmacyi ŭ rehistracyi kniharni. Skarhu razhladaje Viarchoŭny Sud. Ale navat u vypadku, kali sud stanie na jaho bok, heta nie admienić vializny štraf.
«Ja nie źbirajusia źjazdžać ź Biełarusi. Maja žonka pracuje ŭ Vilni. Tamu ja vymušany žyć u Minsku i ŭ Vilni. I nie chaču stračvać takuju mahčymaść. U nas maleńkaja dačka, jakaja choča być z tatam i mamaj».
U płanach u Łohvinava — zarehistravać znoŭ vydaviectva ŭ Biełarusi i pasprabavać stvaryć sietku kniharniaŭ «łohvinaŬ» pa krainie. I chacia jurydyčna jon nie maje ciapier adnosin da kniharni, jon źviazvaje svaju dalejšuju pracu ź joj.
Achviaravańni na ŭratavańnie vydaviectva «Łohvinaŭ» možna zrabić dvuma sposabami.
1) Prynieści hrošy (tolki ŭ biełaruskich rublach) u kniharniu (Minsk, pr-t Niezaležnasi, 37a). Źviarnucca treba da pradaŭca, a pry sabie mieć pašpart.
2) Dasłać na litoŭski rachunak Litaraturnaha doma «Łohvinaŭ» (praź internet-bankinh albo praź sistemu PayPal) u dalarach i jeŭra:
LT052140030003236738
Logvino literaturos namai
Nordea Bankas, Bank code 21400
Swift code NDEALT2X