Fiłosaf Alaksiej Dziermant na sajcie prajekta «Cytadel» zreahavaŭ na fienomien papularnaści vyšyvanak u Biełarusi.
Fota Kyky.org.
Pierš-napierš, fiłosaf-łukašenkaviec adznačaje, što vyšyvanki – heta druhasnaje, a bolšaje značeńnie dla «nacyjanalnaj subjektnaści maje, skažam, parad vajskovaj techniki z udziełam S-300 na šasi, vyrablenym Minskim zavodam kołavych ciahačoŭ».
Dziermant pryznaje, što vyšyvanki – heta dobraja technałohija. «Biaskryŭdnaja kulturnickaja aktyŭnaść, zamiłavańnie svaim, uzdymańnie na ściah taho, što i tak na ściahu – zdajecca, dobraja technałohija, kab dziejničać adkryta i zarablać simvaličny (i nie tolki) kapitał», — piša jon.
Darečy, za apošnija dni nie pieršy raz zaŭvažajecca, što papularyzataraŭ vyšyvanak sprabujuć skampramietavać tym, što jany, maŭlaŭ, nie pra nacyjanalny ŭzdym biełarusaŭ kłapociacca, a zarablajuć hrošy. Voś, naprykład, na dziaržaŭnaj radyjostancyi «Minskaja chvala» padčas hutarki ź lehkaatletkaj Alinaj Tałaj žurnalistka raptam kaža pra vyšyvanki: «Błohiery pišuć, što heta prosta taki biznes, jaki ŭ patrebny momant vyskačyŭ, i na hetym tupa rubiać babki».
Ale vierniemsia da materyjała Alaksieja Dziermanta. Ekśpiert ličyć, što za kašulami dy majkami staić «čarhovaja sproba «zmahańnia» z Režymam [u aŭtara napisana mienavita ź vialikaj litary – «NN»] i ŭschodnim susiedam».
I voś tut samaje cikavaje – Dziermant prapanuje dva šlachi, jak zmahacca z vyšyvanačnaj modaj, prapanuje recepty pa niejtralizacyi bumu. «Heta krytyka prafanacyi i palityzacyi temy pradstaŭnikami etnahrafičnaj supolnaści i hruntoŭnaja navukovaja praca», — piša Dziermant. A voś druhi našmat cikaviejšy. Dziermant prapanuje dziaržavie pierachapić hety trend «i nie dazvalać manapolii na jaje prajdziśvietam».
«Nie treba zabaraniać, treba vyroščvać svajo», — prychodzić da vysnovy ekśpiert.
«Treba dumać nie tolki pra zachavańnie svajoj admietnaści ŭ raznastajnym univiersumie, dzie adbyvajecca biaźlitasnaja kankurencyja kultur i cyvilizacyj, ale i pra toje, što my možam u hetym śviecie śćvierdzić u jakaści svajho ŭniosku. Umoŭna kažučy, ci mohuć vyšyvanka i arnamient abo biełaruskaja tradycyjnaja kultura ŭ cełym stać usiaśvietnym brendam, a nie tolki paznakaj pravincyjnaha nacyjanalizmu?» – piša Alaksiej Dziermant.
«My možam pastavić na mecie i ŭjavić, jak na abšyŭcy skanstrujavanaj z našym udziełam rakiety, što startuje sa schavanaha niedzie ŭ nietrach sibirskaj tajhi kasmadroma, zaźziajuć znaki biełaruskaha arnamientu, dabrasłaŭlajučy jaje ŭ paśpiachovy palot», — zaklučaje fiłosaf.
