1 kastryčnika Polšča časova spyniaje propusk piešachodaŭ praz polska-biełaruskija pamiežnyja pierachody, paviedamlaje sajt Padlaskaha adździaleńnia Pamiežnaj varty Polščy podlaski.strazgraniczna.pl.
«U adpaviednaści z rašeńniem biełaruskich uładaŭ, z 1 kastryčnika 2014 hoda budzie spynieny ruch piešachodaŭ na darožnych kantrolna-prapusknych punktach, raźmieščanych na polska-biełaruskaj miažy, jakija nie majuć asobnych pałos ruchu dla piešachodaŭ, — adznačajecca ŭ paviedamleńni. — Biełarusy zajaŭlajuć, što spynieńnie piešachodnaha ruchu źjaŭlajecca časovym i praciahniecca da abstalavańnia pamiežnych pierachodaŭ na biełaruskim baku nieabchodnaj infrastrukturaj dla kantrolu asob, jakija pierasiakajuć miažu pieššu».
U svaju čarhu polski bok spyniaje propusk piešachodaŭ praz pamiežpierachody «Kuźnica — Bruzhi», «Babroŭniki — Bierastavica», «Pałoŭca — Piasčatka».
Nahadajem, raniej Dziaržaŭny pamiežkamitet Biełarusi abjaviŭ, što 1 kastryčnika časova spyniajecca piešachodny ruch u aŭtadarožnych punktach propusku na miažy Biełarusi z Łatvijaj, Litvoj i Polščaj. Hetaje rašeńnie abumoŭlenaje adsutnaściu ŭ biełaruskich punktach propusku nieabchodnaj infrastruktury dla piešachodnaha ruchu — asobnych piešachodnych kalidoraŭ, asobnych terminałaŭ mytnaha i pamiežnaha afarmleńnia.
Pavodle słoŭ pres-sakratara DPK Alaksandra Ciščanki, prymajučy da ŭvahi isnyja prablemy biaśpieki hramadzian, jakija pierasiakajuć miažu pieššu, i abjektyŭnuju niemahčymaść u najaŭnych umovach apieratyŭna absłuhoŭvać abjomy piešachodnaha ruchu, biełaruski bok vymušany časova spynić raspačaty letaś ekśpierymient da zaviaršeńnia Dziaržaŭnym mytnym kamitetam Biełarusi mierapryjemstvaŭ pa ŭdaskanalvańni infrastruktury punktaŭ propusku z ulikam intaresaŭ piešachodnaha ruchu.
