Dola pakryćcia nasielnictvam stalicy zatrat na kamunalnyja pasłuhi składaje 31%, paviedamiŭ na pres-kanfierencyi 12 vieraśnia ŭ Minsku načalnik upraŭleńnia haradskoj haspadarki i enierhietyki Minharvykankama Dźmitryj Jančyk.
Pavodle jaho słoŭ, dola pakryćcia zatrat na aciapleńnie i haračaje vodazabieśpiačeńnie jašče nižejšaja — 20%. Pakryćcio elektraenierhii i hazu vyšejšaje — 70—78%. «U Minsku pa sabiekošcie my płacim tolki za vyvaz i abiasškodžvańnie ćviordych bytavych adchodaŭ», — skazaŭ Jančyk.
«Łohika padkazvaje, što ŭsio adno my idziom da bolš vysokaj apłaty. Ale na siońnia nam rehłamientavana na ŭsiu apłatu ŽKH piać dołaraŭ za hod. Tamu my sprabujem ukłaścisia ŭ piać dołaraŭ. Pavyšeńnie idzie i raz na kvartał. Tak, 1 vieraśnia pavyšany taryfy na ŭzrovień inflacyi i rost zarabotnaj płaty, ale nie bolš za toje. Toje ž budzie i z 1 śniežnia», — skazaŭ Jančyk.
Jon taksama prakamientavaŭ rašeńnie ab adychodzie ad pierakryžavanaha subsidavańnia. «Jość takaja dumka. Ale pierakłaści zatraty z pradpryjemstvaŭ treba budzie na inšuju katehoryju, a dla hetaha treba znajści niemałyja hrošy. Heta ŭsio ŭ pracesie prapracoŭki», — skazaŭ kiraŭnik upraŭleńnia.
Jančyk taksama adznačyŭ, što rychtujecca ŭkaz prezidenta pa refarmavańni ŽKH. «Tam taksama praduhledžvajecca pieradača kamunalnych ciepłasietak i elektrasietak na bałans Minenierha, pieradača daroh. Heta jomisty prajekt, i jon dapamoža źnizić zatraty ŽKH», — ličyć Jančyk.
