Ad raźvićcia situacyi va Ukrainie budzie zaležać i los Biełarusi, zajaviŭ staršynia ruchu «Za Svabodu» Alaksandr Milinkievič, vystupajučy 26 žniŭnia pad Vilniusam pierad udzielnikami škoły «Biełaruskaja ideja i šlachi nacyjanalnaj kansalidacyi ŭ Biełarusi».
«Biezumoŭna, dla Rasii siońnia hałoŭnaje — asłablać Ukrainu, dla jaje vielmi važna, kab ukraincy nie išli ŭ NATA. Ad raźvićcia padziej tam budzie zaležać i naš los», — cytuje Milinkieviča pres-słužba ruchu.
Adnoj z prablem Biełarusi palityk bačyć u źniščeńni biełaruskaj elity. «Biełarus straciŭ aryjentacyju», — zajaviŭ jon.
«Ja tak šmat kažu pra nacyjanalnuju śviadomaść, bo, kab iści ŭ Jeŭropu, nam nieabchodna Adradžeńnie», — adznačyŭ jon.
Pieršy namieśnik staršyni ruchu «Za Svabodu» Juryj Hubarevič, jak paviedamlaje pres-słužba arhanizacyi, «z aptymizmam pryvioŭ vyniki sacyjałahičnych apytańniaŭ, jakija pakazvajuć vysokuju simpatyju biełarusaŭ da Jeŭrasajuza». «Takaja kolkaść ludziej, jakija žadajuć ruchu ŭ bok Jeŭropy, idzie na karyść nie litoŭskamu «Akropalisu», a jeŭrapiejskim kaštoŭnaściam», — skazaŭ jon. Pavodle mierkavańnia Hubareviča, u Biełarusi «isnuje vielizarny patencyjał jeŭrapiejskaj opcyi, choć, zrazumieła, jon nie taki vysoki, jak va Ukrainie».