«Ja nie budu šmat havaryć pra sustreču ŭ Minsku, ale heta — mahčymaść, jakuju nielha prapuścić», — zajaviła viarchoŭny pradstaŭnik ES pa źniešnich spravach i palitycy biaśpieki Ketryn Eštan 24 žniŭnia na Jeŭrapiejskim palityčnym forumie ŭ Alpbachu (Aŭstryja).
Eštan taksama ličyć, što Ukrainie nieabchodna vybudoŭvać dobryja adnosiny jak z krainami Jeŭrasajuza, tak i z Rasijaj. «Heta vaša kraina (Ukraina), i vy prymajecie rašeńni, vybirajecie svaju budučyniu. Vy vybrali svajho prezidenta i šlach, pa jakim iści napierad. Vam patrebnyja dobryja adnosiny ź jeŭrapiejskimi susiedziami i z Rasijaj», — cytuje viarchoŭnaha pradstaŭnika ES ahienctva ITAR-TASS.
Nahadajem, 26 žniŭnia ŭ Minsku płanujecca sustreča ŭ farmacie Mytny sajuz — ES — Ukraina z udziełam prezidentaŭ Uładzimira Pucina, Piatra Parašenki, Alaksandra Łukašenki, Nursułtana Nazarbajeva, Ketryn Eštan, a taksama adkaznaha za enierhietyku vice-staršyni Jeŭrakamisii Hiuntera Etynhiera i jeŭrakamisara pa handli Kareła de Hiuchta.
21 žniŭnia Piatro Parašenka zajaviŭ, što jedzie ŭ Minsk damaŭlacca ab miry, bo «ŭvieś śviet stamiŭsia ad vajny». Pavodle słoŭ Parašenki, na minskaj sustrečy jon «zaklikaje zabrać bajevikoŭ z Ukrainy». «Upeŭnieny, što nam heta ŭdasca», — skazaŭ ukrainski lidar.
23 žniŭnia, sustrakajučysia ŭ Kijevie z kancleram Hiermanii Anhiełaj Mierkiel, Parašenka zajaviŭ, što Ukraina i ES dziejničajuć u ciesnym kantakcie, i tak budzie padčas pieramoŭ u Minsku. «Heta ŭnikalny vypadak, kali takaja pradstaŭničaja delehacyja ES razam z Ukrainaj voźmie ŭdzieł u pieramovach takoha vysokaha ŭzroŭniu. My vielmi spadziajemsia na pazityŭny vynik», — skazaŭ prezident Ukrainy.
Anhieła Mierkiel u adkaz adznačyła, što raźličvaje na pośpiech pieramoŭ u Minsku. «Ja akažu ŭsialakuju padtrymku, kali ŭ Minsku buduć razmaŭlać adzin z adnym i sprabavać usio ž zrabić krok napierad», — zajaviła kancler Hiermanii.
