Ad siońnia, 24 lipienia, i da kanca žniŭnia ŭ staličnaj art-prastory «CECH» možna pabačyć vystavu «Vizualnyja vobrazy histaryčnaj pamiaci, albo Vialikaje Kniastva Litoŭskaje na staražytnych hieahrafičnych mapach».
Pieršaja hieahrafičnaja mapa ŭłasna VKŁ, stvoranaja ŭ 1595 hodzie znakamitym fłamandskim kartohrafam i hieohrafam Hierardam Mierkataram
Ebstarfskaja mapa śvietu 1290 hoda, centr śvietu pavodle jaje znachodzicca ŭ Ijerusalimie (pup ziamli), dzie źmieščanaja vyjava ŭvaskresieńnia Chrysta.
Mapy zaŭsiody vykonvali svojeasablivuju rolu partałaŭ, jakija dazvalajuć vandravać pa roznych časach i prastorach, historyjach, movach i kulturach. U staražytnaści śviet dla kartohrafaŭ jašče nie vymiaraŭsia pa milimietrach pry dapamozie spadarožnikaŭ, i tamu na mapach možna pabačyć nie stolki miežy krain dy kantynientaŭ, kolki ŭnikalny mastacki padychod. Tamu sama vystava aryjentavanaja i na rozum, i na hust hledača, kab jon atrymaŭ nie tolki infarmacyju, ale i estetyčnuju asałodu.
Biełaruskaja fiłasofskaja prastora, Latučy univiersitet, Vydaviectva «Ekanompres», kreatyŭnaja prastora CECH prapanujuć siońnia zirnuć na hieahrafičnyja mapy Vialikaha Kniastva Litoŭskaha, Rečy Paspalitaj, Jeŭropy i śvietu i pasprabavać ubačyć siabie ŭ inšym histaryčnym rakursie i masštabie, akunucca ŭ śviet vobrazaŭ i dyskusij, jakija mohuć padšturchnuć nas da pieraasensavańnia svaich ujaŭleńniaŭ pra miežy Biełarusi.
Akramia samoj vystavy arhanizatary ładziać i tematyčnyja dyskusii:
1 žniŭnia, 18.00 – dyskusija z udziełam viadomych fiłosafaŭ, kulturołahaŭ, dyzajnieraŭ: «Dzie ŭ Suśviecie płyvie Biełaruś?..» Jak i dzie my znachodzim siabie, u jakich miežach vyznačajem – hieahrafičnych, palityčnych, kulturnych? Ci mohuć mapy stać srodkam «pošuku siabie»?
13 žniŭnia, 18.00 – dyskusija z udziełam biełaruskich historykaŭ i sacyjołahaŭ: «Biełaruskaja kartahrafija jak dyscyplina i padmurak samavyznačeńnia». Ci isnuje biełaruskaja kartahrafija jak asobnaja śfiera? Jakim čynam jana ŭpłyvaje na dyzajn, adukacyju, navuku? Jak i kudy raspraścirajucca jaje vyniki i efiekty?
Akramia taho, kožny maje ŭnikalnuju mahčymaść zamović kopiju luboj mapy z vystavy, kab upryhožyć interjer ci zrabić niezvyčajny padarunak. Košt takoj pakupki zaležyć ad pamieru, papiery i najaŭnaści ci adsutnaści ramy. Za padrabiaznaściami źviartajciesia da administracyi CECHa.
Usie mierapryjemstvy buduć pravodzicca na placoŭkach kreatyŭnaj prastory «CECH» (pa adrasie pr. Niezaležnaści 58 / k.6), sama ž vystava praciahniecca da kanca žniŭnia. Naviedvańnie vystavy biaspłatnaje.
