Unačy na čaćvier afrykanskaja čuma śviniej (AČS) była vyjaŭlenaja na kompleksie z pahałoŭjem 20.000 śviniej u Ihnalinskaj rajonie Litvy. Śvinakompleks naležyć kampanii Idavang z dackim kapitałam.
«Učora ŭviečary my atrymali paviedamleńnie, što pačaŭsia padziož śviniej u filijale pradpryjemstva Rupinskaj», — paćvierdziŭ ahienctvu DELFI dyrektar Dziaržaŭnaj charčova-vieterynarnaj słužby Litvy Jonas Milus.
Pavodle jaho słoŭ, hetaja fierma była prykładam dla mnohich, na joj prymianiajucca prahresiŭnyja achoŭnyja srodki: «Jaje my pakazvali i zamiežnikam, a ŭ minułym miesiacy i rasijanam, jak uzornuju. Padvojnaja aharodža, praktyčna ni adna mašyna nie traplaje ŭnutr, navat małako padajecca ŭ šłanhach, a nie mašynami».
Pavodle Milusa, ciapier viadziecca pravierka, jakim čynam ačah chvaroby moh patrapić na śvinafiermu. Nakiravana zajava i ŭ prakuraturu.
«My nie adkidajem, što heta mahło być i naŭmysnaje zaražeńnie. Bo była zaŭvažanaja vielmi dziŭnaja reč.
My majem vopyt z kłasičnaj čumoj śviniej, u takim vypadku zachvorvaje adna fierma, a ŭ hetym kompleksie śvińni zachvareli adrazu ŭ niekalkich», — prakamientavaŭ čynoŭnik.
Jon nie admaŭlaje, što śvińni mahli być zaražanyja praz korm.
Pavodle jaho słoŭ, viadziecca ŭsypleńnie śviniej hazam. Źniščany buduć usie žyvioły śvinafiermy — 20.000.
«Zakopvać budziem na miescy, bo vielmi horača», — skazaŭ Milus.
Ministr sielskaj haspadarki Litvy Virhinija Bałtrajcienie paŭtaryła, što śvinahadoŭčy kompleks Idavang dackaha kapitału ŭ Litvie mahčyma naŭmysna byŭ zaražany afrykanskaj čumoj śviniej. Pavodle aficyjnych dadzienych, z 40 žyvioł, jakija padvierhlisia abśledavańniu, infiekcyja była vyjaŭlenaja ŭ 36.
Bałtrajcienie nie ličyć, što ŭ cełym litoŭski biźnies paniasie značnyja straty, adnak pryznała, što straty kampanii Idavang buduć vializnyja.
Kampanija Idavang, jakomu naležać ŭ Litvie 11 śvinahadoŭčych kompleksaŭ, paviedamiła, što vykonvała ŭsie patrabavańni biaśpieki.
Paśla taho jak u pačatku hoda było ŭstanoŭlena zaražeńnie kabanoŭ AČS, zaražanyja ŭčastki lesu byli akružany śpiecyjalnym płotam.
«Nam vielmi nie pašancavała, ci my čahości nie darabili», — śćviardžaje były ministr navakolnaha asiarodździa Valancinas Mazuronis.
«Z adnaho boku heta adkaz advažnym aptymistam, jakija napadali, kažučy, što my nibyta darma hetych kabanoŭ stralajem, nibyta čuma śviniej nam nie pahražaje.
Ale ja dumaju, što Ministerstva navakolnaha asiarodździa zrabiła ŭsio, što mahło, ja maju na ŭvazie i kabanoŭ, i palavańnie. Ministerstva sielskaj haspadarki vykonvaje ŭsie miery. Mnie składana skazać, ale navat pry tym nikoli nie było harantyj, što heta nie adbudziecca», — skazaŭ eks-ministr.
Pavodle jaho słoŭ, sumnievy vyklikajuć i susiednija krainy.
Mazuronis adznačaje, što Biełaruś ab baraćbie z afrykanskaj čumoj śviniej «kaža nie ŭsiu praŭdu». Čuma raspaŭsiudžvałasia i ŭ Polščy.
«Z ulikam takoj situacyi, zrazumieła, što cudaŭ u pryrodzie nie byvaje. Kali chvaroba raspaŭsiudžvajecca, značyć, jana pryjdzie i ŭ Litvu, tolki pytańnie, kali i ŭ jakim maštabie», — skazaŭ palityk.
Na pytańnie ab mahčymaściach ekspartavać śvininu palityk skazaŭ, što «mahčyma ŭsio».
«Heta budzie zaležać i ad taho, jakija miery my prymiem jak kraina dla zabieśpiačeńnia taho, kab chvaroba była łakalizavanaja, kab jana nie raspaŭsiudžvałasia… Ale kali heta zroblena nie budzie, to ja bajusia, što nijakija pieramovy nie dapamohuć. Tady ja dumaju, što mahčymy horšy scenar», — skazaŭ Mazuronis.
